ئەستێرەی یاریگا؛ محەمەد خەلیل باشترین یاریزانی گەڕی یازدەمی خولی نایابی کوردستان بوو

یاریگا –

محەمەد خەلیل باشترین یاریزانی گەڕی یازدەمی خولی نایابی کوردستان بوو،  کە دووەم وەرزە لەسەریەک تۆڕی وەرزشی یاریگا ئەستێرەی هەر گەڕێکی خولەکە دەستنیشان دەکات.

محەمەد خەلیل ناوەڕاستکاری برایەتی لە گەڕی یازدەمی خولی نایابی کوردستان لە یاریی بەرامبەر چوارقوڕنە لە خولەکەکانی 66 و 78 دوو گۆڵی کرد و ئەنجامەکەی گەڕاندەوە خاڵی سەرەتا و بەرامبەر یانەی پێشووی خۆی خاڵێکی بۆ سەوزپۆشەکان بەدەستهێنا، کە سێیەمجارە لەم وەرزە بە ئەستێرەی یاریگا دەستنیشان بکرێت.

محەمەد خەلیل پێشتر لە گەڕەکانی پێنجەم و هەشتەم بە ئەستێرەی یاریگا دەستنیشانکراوە و سێیەمجارە بە باشترین یاریزانی گەڕی خولی نایابی کوردستان هەڵدەبژێردرێت، کە لەم وەرزە لە 11 یاری 9 گۆڵی بە درێسی برایەتی کردووە.

ناوەڕاستکارە 25 ساڵانەکەی برایەتی هاوینی رابردوو لە لە بازاڕی گواستنەوەی هاوینە لە چوارقوڕنەوە پەیوەندی بە ریزەکانی یانەکەی هەولێر کرد، پێشتریش لە ریزی یانەکانی چەمچەماڵ و نەورۆزیش یاریی کردووە.

لە گەڕی یازدەمی خولی نایابی کوردستان لە کۆی 7 یاری 16 گۆڵ تۆمارکران، واتە 2.2 گۆڵ لە هەر یارییەک تۆمارکران، ناوبژیوانان لە یارییەکانی خولەکە سێ کارتی سووریان بەڕووی یاریزانان بەرزکردەوە.

شێروانە بە کۆکردنەوەی 23 خاڵ لە پێشەنگی خولی نایابی کوردستان مایەوە و پێشمەرگەی هەولێریش بە 19 خاڵ و زاخۆ بە 17 خاڵ پلەکانی دووەم و سێیەمیان گرتووە.