راپۆرتی تایبەت؛ چۆن ئارسیناڵ لە پرێمەرلیگ بووە پاشای کۆڕنەکان؟

یاریگا –

ئارسیناڵ لە پرێمەرلیگ بووەتە پاشای کۆڕنەکان، دوو وەرزە هیچ یانەیەکی پرێمەرلیگ لە گەنەرز زیاتر بە کۆڕنە گۆڵی نەکردووە، گابریێل بەرگریکاری بەڕازیلی یانەکە بووەتە سیمبوڵێکی کۆڕنەکانی یانەکەی لەندەن.

ئارسیناڵ لە دەستپێکی وەرزی رابردووەوە زۆرترین گۆڵی بە کۆڕنە کردووە

لە دەستپێکی وەرزی رابردووەوە تا ئێستا ئارسیناڵ تاکە یانەیە لە پرێمەرلیگ 20 گۆڵی بە کۆڕنە کردووە، مانچێستەر سیتی نزیکترین رکابەری گەنەرزە و لەو ماوەیەدا 15 گۆڵی بە کۆڕنە کردووە.

لەو 20 گۆڵەی ئارسیناڵ بە کۆڕنە تۆماریکردوون، گابریێل 5 گۆڵی کردووە و سالیباش 2 گۆڵی کردووە، بەرگریکارەکانی یانە لەندەنییەکە لە کۆڕنەکان بوونەتە چەکیکی بەهێزی میکێل ئارتێتا.

گابریێل ماگالایش لەم وەرزە بووەتە نیشانەیەکی ئارسیناڵ لەکاتی جێبەجێکردنی کۆڕنەکان، لەم وەرزەی پرێمەرلیگ لەکۆی 82 کۆڕنە گابریێل بەشداریی تیادا کردبێت، 11 تۆپی راستەوخۆ گەیەنراوەتە گابریێل بۆ ئەوەی بە لێدانی سەر ئاڕاستەی گۆڵیان بکات.

چۆن ئارسیناڵ چەکی کۆڕنەی بەهێزکرد؟

نیکۆلاس یۆڤێر راهێنەرێکی تایبەتی تۆپە جێگرەکانە، ئەم راهێنەرە ئیسپانییە ساڵی 2021 لە مانچێستەر سیتییەوە پەیوەندی بە ئارسیناڵ کرد و بووە ئەندامی دەستەی راهێنەرانی گەنەرز، بۆ ئەوەی کار لەسەر تۆپە جێگرەکان بکات.

دێکلان رایس و بوکایۆ ساکا لە کۆڕنەکان جێبەجێکاری پلانەکانی یۆڤێرن، راهێنەرە تایبەتەکەی ئارسیناڵ بڕوای وایە لەکاتی جێبەجێکردنی کۆڕنەکان تۆپەکە بەرەو گۆڵ بسوڕێتەوە، واتە لەلای راست ساکا کۆڕنە لێدەدات، لەلای چەپ رایس کۆڕنە جێبەجێ دەکات، بۆ ئەوەی تۆپ رووی لە گۆڵ بێت و پێویستی بە بەرکەوتنێکی کەم بێت بۆ ئەوەی بچێتە ناو گۆڵ.