چێڵسی نرخی ئەستێرەکەی بۆ ریاڵ مەدرید دیاریکرد

یاریگا –

یانەی چێڵسی ئینگلیزی لە نیازەکانی ریاڵ مەدرید تێگەشتووە کە دەیەوێ جووڵەیەکی گەورە بکات لە بازاڕەکانی داهاتوودا. بۆیە بڕە پارەیەکی زۆری خستووەتە سەر یاریزانێکی بۆ یانە شاهانەکەی ئیسپانیا.

ریاڵ هەر لەدوای رۆشتنی تۆنی کرووسەوە کەموکورتیەکانی لە هێڵی ناوەند دەرکەوت و یاری لەدوای یاریی هاندەرانی مێرەنگی لە هەرکات زیاتر هەست بە چۆڵی شوێنی ئەندازیارە ئەڵمانییەکە دەکەن. هەر بۆیە گواستنەوەی ناوەڕاستکارێک یەکێکە لە لیستی کڕینەکانیان. بۆ ئەو مەبەستەش ئینزۆ فێرناندێز لە چێڵسی بژاردەیەکە لە بژاردەکانی مەدرید بۆ چوونەپێشەوە لێی.

بەگوێرەی زانیارییەکانی دیفێنسا سێنتراڵی ئیسپانی و نزیک لە یانەکەی پایتەخت، بلووز نرخی ئەستێرە ئەرجەنتینیەکەی بۆ لایەنی ئیسپانی دیاریکردووە و داوای 120 ملیۆن پاوەند دەکات بۆ دەستبەرداربوون لێی.

ئەگەر ریاڵ مەدرید بەو نرخە رازی بێت، ئەوا ناوەڕاستکارەکەی تانگۆ دەبێتە دووەم گرانبەهاترین یاریزان ریاڵ لە مێژووی خۆیدا گواستبێتیەوە.

گرانترین گواستنەوە لۆس بلانکۆس ئەنجامیدابێت، گواستنەوەی ئێدن هازار بەلجیکی بوو لە ساڵی 2019 کە بڕی 130 ملیۆنی تێچوو.