کێشە داراییەکانی رانیە چارەسەر دەکرێت و یاریزانەکانی یانەکە بایکۆت دەشکێنن

یاریگا –

کێشە داراییەکانی رانیە چارەسەر دەکرێت و یاریزانانی یانەکە بایکۆتەکەیان دەشکێنن و بۆ یاریی داهاتووی لە خولی نایابی کوردستان ئامادە دەبن.

بێستوون ئیبراهیم، بەرپرسی راگەیاندنی یانەی رانیە بە تۆڕی وەرزشی یاریگای راگەیاند :’کێشە داراییەکانی یانەکەمان چارەسەر دەکرێت و بۆ یاریی داهاتووی خولی نایابی کوردستان ئامادە دەبین، بەرپرسان بەڵێنی دابینکردنی بودجەیان پێداوین بۆ ئەوەی مووچەی یاریزانەکانمان بدەین’.

بەهۆی ئەوەی زیاتر لە 45 رۆژە یاریزانانی رانیە مووچەیان وەرنەگرتبوو، دوێنێ یاریزانانی رانیە لە یارییەکەیان لە گەڕی سێیەمی خولی نایابی کوردستان بەرامبەر شێروانە ئامادە نەبوون، بۆیە یارییەکە بە ئەنجامی 3-0 لە بەرژەوەندیی شێروانە هەژمارکرا.

رانیە لە گەڕی چوارەمی خولی نایابی کوردستان لە یاریگای سەنگەسەر میوانداریی دەربەندیخان دەکات، کە لە دوو گەڕی سەرەتای بردنەوە و دۆڕانێکی هەبوو خاوەنی سێ خالە.