یاریگا –
بەهۆی ئامادە نەبوونی رانیە لە یارییەکەیان لە گەڕی سێیەمی خولی نایابی کوردستان، بەفەرمی شێروانە 3-0 بە براوە هەژمارکرا.
یاریزانانی شێروانە لە یاریگای سەنگەسەر ئامادەبوون، دەستیە ناوبژیوانانی یارییەکە دوای ئەوەی بەگوێرەی یاسا 15 خولەک چاوەڕێیان کرد، یاریزانانی رانیە نەهاتنە ناو یاریگا و ناوبژیوان فیکەی کۆتایی یارییەکەی لە بەرژەوەندی شێروانەی میوان بە ئەنجامی 3-0 لێدا.
بڕیاربوو ئەمڕۆ کاتژمێر 14:00 بەکاتی هەولێر لە یارییەکانی گەڕی سێیەمی خولی نایابی کوردستان، رانیە لە یاریگای سەنگەسەر میوانداری شێروانە بکات. بەڵام یاریزانانی یانەی رانیە بەهۆی وەرنەگرتنی شایستەکانی دارایی، ئامادەی یارییەکە نەبوون، بەو هۆیە سێ خاڵی یارییەکە بە شێروانە دەدرێت.
شێروانە بەم بردنەوەیە بە کۆکردنەوەی 7 خاڵ بە جیاوازیی گۆڵ لەگەڵ پیشەسازی دێتە پلەی یەکەمی خولی نایابی کوردستان.
