پیشەسازی ریکۆردێکی مێژوویی تۆمار دەکات

یاریگا –

یانەی پیشەسازی کە بەشدارە لە خولی نایابی کوردستان ریکۆردێکی مێژوویی تۆمار دەکات.

دوای سەرکەوتنیان لە یاریی ئەمرۆ بەرامبەر چوارقوڕنە، پیشەسازی ریکۆردێکی مێژوویی تۆمار کرد و 604 رۆژە لە خولەکانی کوردستان شکستی نەهێناوە، دوایین شکستی پیشەسازی لە 18 / 3 / 2023 بوو کاتێک لە خولی پلە یەکی کوردستان بۆ وەرزی 2022 _ 2023   دوایین یاری خولەکەی لە یاریگای خۆی بەرامبەر شۆریجە بە ئەنجامی 1 _ 0 دۆڕاند.

بە راهێنەرایەتی مەولود رەمەزان وەرزی رابردوو پیشەسازی بەبێ هیچ شکستێک و بە پلەی یەکەم سەرکەوت بۆ ریزی نایابی کوردستان، ئەم وەرزەش لە یەکەم بەشداریکردنیان لە خولی نایابی کوردستان لە سێ یارییدا دوو سەرکەوتن و یەکسان بوونێکی هەیە و بە حەفت خاڵ له ریزبەندی یەکەمی خولەکە دێت.