لە یەکەم دیداریدا لەگەڵ چێڵسی، مارێسکا چی بە بەرپرسانی یانەکە وتووە؟

یاریگا –

ئینزۆ مارێسکای راهێنەری چێڵسی مژدەی ئاییندەیەکی گەش دەدات بەم تیمەی ئێستای بلووز.

ئەمڕۆ لە تاقیکردنەوەیەکی دیکەی قورسدا چێڵسی لە یاریگای خۆی پێشوازی لە ئارسیناڵی هاوشاری دەکات لە میانی گەڕی 11ی خولی ئینگلیزیدا.

لە کۆنفرانسی رۆژنامەوانی پێش یارییەکە راهێنەرە ئیتاڵیەکە باسی لەو یەکەمین دیدارەکرد کە تێیدا نوێنەرانی یانە لەندەنیەکە لەگەڵیدا کۆبووبوونەوە بۆ دەستنیشانکردنی وەک راهێنەری نوێی چێڵسی. ئینزۆ وتی

یەکەم جار چاوم بە نوێنەرانی یانەکە کەوت، یەکەم شتێک پێم وتن ئەمەبوو: گرنگ نییە ئێوە وەک راهێنەر دەستنیشاندەکەن یاخود نا، بەهۆی پێکهاتە و تەمەنی تیمەکەوە، ئێوە باڵادەست دەبن بەسەر تۆپی پێی ئینگلیزیدا

ئەم تیمەی ئێستا مارێسکا سەرپەرشتی دەکات، بچووکترین تیمی نێو سەرجەم یانەکانی ئەم وەرزەی خولی ئینگلیزین کە ناوەندی تەمەنیان دەکاتە 23 ساڵ و 4 مانگ. گەنجترین یانەیش لێیانەوە تۆتنهامە بە ناوەندە تەمەنی 24 ساڵ و 7 مانگ.

ئینزۆ کە پێشتر ئەزموونی لەگەڵ پارما لە ساڵی 2021 و پاشان لەگەڵ لێیستەر سیتی سیتی لە 2023-2024، هاوینی رابردوو بە گرێبەستێکی 5 ساڵی و ئەگەری درێژکردنەوەی ساڵێ زیاتریش، گواسترایەوە چێڵسی و تا ئێستا توانیویەتی روخسارێکی کێبڕکێکار بە یانەکە ببەخشێتەوە. ئەمشەو لەنێو ستامفۆردبریج شەڕی بردنەوەی سێ خاڵی یارییەکە دەکات تا بگات بە پلەی سێیەمی ریزبەندی خولەکە. لە کۆنفرانسلیگیش 3 یاریی ئەنجامداوە هەمووی بردووەتەوە و پێشەنگی پاڵەوانێتیەکەن و 16 گۆڵیان تۆمارکردووە.

https://twitter.com/FabrizioRomano/status/1855582402271142092