یاریگا –
خولی رۆشنی سعودی به نیازه له ماوه‌ی مێڕكاتۆی زستانه‌ی ئه‌مساڵ و هاوینه، ئه‌ستێره‌كانی پڕێمه‌رلیگ بگوازێته‌وه یانه‌كانی خوله‌كه.
لە راپۆرتێکدا کە ماڵپەڕی TBR Football بڵاویکردووەتەوە، خولی سعودیە ئامانجی گواستنەوەی محەمەد سەڵاحی میسری، ئەستێرەی لیڤەرپوولی ئینگلیزی و هیونگ مین سۆنی کۆریای باشوور، ئەستێرەی تۆتنهامی ئینگلیزی و دی برۆین یاریزانی مانچێسته‌ر سیتیه.
مایکل ئیمێنالۆ، بەڕێوەبەری وەرزشی خولی سعودی رایگه‌یاند، بەنیازین لە ماوەی مێركاتۆی زستانه و هاوینه‌ی داهاتوو ژمارەیەک ئەستێرەی خولی نایابی ئینگلیزی بگوازێنه‌وه سعودیه.
گرێبەستی سەڵاح و سۆن لەگەڵ یانه‌كانیان لە کۆتایی ئەم وەرزەدا کۆتایی دێت، ئەمەش وایکردووە به‌رپرسانی سعودیه هه‌وڵی گواستنه‌وه‌یان بده‌ن.
ماڵپه‌ره‌كه ئاماژه‌ی به‌وه‌كردووه، جگه له‌م سێ ئه‌ستێره‌یه، ئەلیسۆنی پیكه‌ری گۆڵپارێزی لیڤەرپوول و ئیدرسۆنی، گۆڵپارێزی مانچێستەر سیتی، لەگەڵ دوو یاریزانی مانچێستەر یونایتد کاسیمیرۆ و ئەنتۆنی، تۆماس پارتی یاریزانی ئارسناڵ و کالڤێرت لوین یاریزانی ئیڤەرتۆن و فابیان شار یاریزانی نیوکاسڵ و ئۆلا ئاینا یاریزانی یانەی نۆتینگام له پلانی خولی سعودین.
خولی سعودیە لە ماوەی دوو وەرزی رابردوودا سەرکەوتوو بووە لە گواستنه‌وه‌ی چەند ئەستێرەی گەورە، له دیاترینیان کریستیانۆ رۆناڵدۆی پورتوگالی و کەریم بێنیزیمای فەرەنسی و سادیۆ مانێی سەنیگالی و مارسێلۆ برۆزۆڤیچی کرواتی.
