یاریگا –
رۆژی یەکشەممە تیروپشکی وەرزی نوێی خولی نایابی کوردستان رادەکێشرێت و هەر 16 یانەکە بەشداریی دەکەن.
بەگوێرەی بەدواداچوونەکانی تۆڕی وەرزشی یاریگا، دوای نیوەڕۆی رۆژی یەکشەممە تیروپشکی وەرزی نوێی خولی نایابی کوردستان لە هەولێر رادەکێشرێت، سەرجەم یانەکان بەشداریی خولەکە دەکەن لەکاتێکدا پێشتر یانەکانی سەیدسادق و ئارارات بەهۆی قەیرانی داراییەوە هەڕەشەی کشانەوەیان دەکرد.
رۆژی 7ـی نۆڤێمبەر/تشرینی دووەم وەرزی نوێی خولی نایابی کوردستان بە بەشداریی 16 یانە دەستپێدەکات و سیستەمی خولەکە وەکو وەرزی رابردوو بە شێوازی خول دەبێت، کە پێشتر لێژنەی پێشبڕکێیەکان لە فیدراسیۆنی تۆپی پێی کوردستان بڕیاریداوە لە وەرزی نوێ چوار یانە دابەزن بۆ ریزی یانە پلە یەکەکان.
خولی نایابی کوردستان لەوەتەی ساڵی 2005 لەسەر ئاستی یانەکانی سەرانسەری هەرێمی کوردستان بەڕێوە دەچێت، وەرزی رابردوو ئاکرێ بۆیەکەمجار لە مێژوودا بووە پاڵەوانی خولەکە.
