یاریگا –
جویل ماتیپ بەرگریکاری لیڤەرپوول بەفەرمی وازهێنانی یەكجاری لە یاریی تۆپی پێ راگەیاند.
جویل ماتیپ بەرگریکاری کامیڕۆنی یانەی لیڤەرپوولی ئینگلیزی بەفەرمی لە تەمەنی 33 ساڵیدا وازهێنانی لە یاریکردن راگەیاند، کە 201 یاری بە درێسی رێدز ئەنجام دا و 8 ساڵ بوو درێسی ئەو یانە ئینگلیزییەی دەپۆشی.
ماتیپ کە ساڵی 2016 بە گرێبەستێکی ئازاد لە شاڵکێی ئەڵمانییەوە روویکردە ریزەکانی لیڤەرپوول، نازناوەکانی پرێمەرلیگ و چامپیۆنزلیگ و سوپەری ئەوروپای لەگەڵ رێدز بەدەستهێنا و 11 گۆڵ و 6 ئەسیستی بۆ یانە سوورپۆشەکە کرد.
ئەم هاوینە ماتیپ گرێبەستەکەی لەگەڵ لیڤەرپوول کۆتایی هات و بەبێ یانە مابووەوە، بەفەرمی بڕیاریدا کۆتایی بە کاروانی وەرزشی خۆی بهێنێت، کە بەرگریکارەکەی لیڤەرپوول لەگەڵ هەڵبژاردەی کامیرۆن خاوەنی 27 یاریی و گۆڵێکی نێودەوڵەتی بوو.
