یاریگا –
گەرچی 46 رۆژ بۆ دەستپێکی خولی نایابی کوردستان ماوە، کەچی تاوەکو ئێستا 7 یانە دەستیان بە مەشق و راهێنانەکان نەکردووە.
بەگوێرەی بەدواداچوونەکانی تۆڕی وەرزشی یاریگا، تاوەکو ئێستا یانەکانی سەیدسادق، ئارارات، شەقڵاوە، زاخۆ، رانیە، چوارقوڕنە و رزگاری دەستیان بە مەشق و راهێنان نەکردووە و هێشتا وادەی دەستپێکردنی راهێنانەکانی یانەکان نادیارە.
وابڕیارە رۆژی 7ـی نۆڤێمبەر/تشرینی دووەمی 2024 وەرزی نوێی خولی نایابی کوردستان دەستپێبکات و تەنیا 46 رۆژ ماوە، کەچی لەکۆی 16 یانەی خولەکە تەنیا 9 یانە دەستیان بە مەشق و راهێنان کردووە.
بەشێک لە یانەکان بەهۆی قەیرانی داراییەوە تاوەکو ئێستا هیچ ئامادەکارییەکیان بۆ وەرزی نوێ نەکردووە، هەندێکیشیان دەستیان بە گرێبەستی یاریزانان کردووە، بەڵام هێشتا دەستیان بە کەمپی مەشق و راهێنان نەکردووە.
