عەلی ئەسەدی: رێگر نابین لە بەردەم خەونەکانی عەلی جاسم
یاریگا-
دوای پۆستێکی یاریزان عەلی جاسم لە سەر کارگێڕی یانەی کارەبا دەربارەی ئەوەی یانەکە رێگرە لە چونی بۆ یانەیەکی ئەوڕوپی، سەرۆکی کارەبا بە فەرمی وەڵامی یاریزانی ناوبراوی دایەوە.
عەلی ئەسەدی سەرۆکی یانەی کارەبا سەبارەت بەو گرێبەستانەی بۆ یاریزان عەلی جاسم هاتووە بۆ بەرنامەی کاس گوتی :
دوێنێ بە فەرمی گرێبەستی کۆمۆی ئیتاڵیمان پێگەیشتووە بە مەبەستی واژۆکردنی گرێبەست لەگەڵ عەلی جاسم، کۆمۆ 400 هەزار دۆلاری پێشکەش کردووە کە 200 هەزار دۆلار لە بری دەستبەردار بوونەکەیە و 200 هەزار دۆلاریش بۆ یاریزانەکەیە، ئێمە بە مافی خۆمانی دەزانین ئەوەی باشترینە ئەو هەڵبژێرین، بەڵام بەڕێوەبەری کارەکانی یاریزانەکە بە هەر شێوەیەک بێت دەیەوێ عەلی بنێرێتە ئەوروپا بەبێ رەچاوکردنی بەرژەوەندی ئێمە، ئێمە مامەڵە لەگەڵ گرێبەستی فەرمی دەکەین نەک گرێبەستەکانی سۆشیال میدیا، تا ئێستا ریال بێتسی ئیسپانی بە فەرمی هیچ شتێکی بۆ ئێمە نەناردووە، رێگر نابین لە بەردەم ئامانج و خەونەکانی یاریزانەکە لە داهاتوو بەڵام دەمانەوێ باشترین هەڵبژێرین.
ئەسەدی دەربارەی گرێبەستی عەلی جاسم لە وەرزی رابردوو لەگەڵ ئەنتاڵیا سپۆری تورکی و هەڵوەشاندنەوەی گرێبەستی نێوان یانەکە و یاریزانەکە رایگەیاند :
ئێمە گرێبەستمان لەگەڵ یانەی ئەنتاڵیا سپۆر هەیە کە عەلی جاسم تا کۆتایی ئەم وەرزە ناتوانێت پەیوەندی بە هیچ یانەیەکی دەرەوەی عێراق بکات، لە بڕگەیەک لە گرێبەستی نێوانمان هاتووە کە ئەگەر پێش تەواو بوونی یارییەکانی ئەم وەرزە یاریزانەکە گرێبەست لەگەڵ هەر یانەیەک واژۆ بکات ئەوا دەبێ کارەبا بڕی 200 هەزار دۆلار وەک سزا بدات بە یانە تورکیەکە.
ماوەی دوو رۆژە چوونی عەلی جاسم بۆ یانەی کۆمۆی ئیتاڵی کەم وەرزە سەرکەوتووە بۆ سیریا ئەی میدیای عێراقی تەنیوە و باس لەوەش دەکرێت کە ریال بێتسی ئیسپانی دەیەوێت بە فەرمی گرێبەست پێشکەش بە یاریزانەکە بکات تاوەکو وەرزی داهاتوو لە لالیگا یاری بکات، بەڵام تا ئێستا تەنها گرێبەستی کۆمۆ فەرمیە و یاریزانەکەش ئارەزوو دەکات بچێتە ئیتاڵیا.
