یاریگا –
تۆماس توخێل دوایین هەفتەکانی خۆی لەگەڵ بایەرن میونخ بەڕێدەکات سەرەڕای گەیاندنی یانەکە بە چوارگۆشەی زێڕینی چامپیۆنزلیگ. دوایین هەفتەکان، چونکە کارگێڕی بایەرن پێیانوایە ناوبراو لە ئاست خواستەکانیاندا نەبووە.
بەگوێرەی نوێترین زانیاریییەکان، لە پریمەرلیگەوە گفتوگۆ لەگەڵ بریکاری راهێنەرە ئەڵمانییەکەدا دەستیپێکردووە بۆ دەستنیشانکردنی وەک راهێنەری نوێ دوای کۆتایی هاتنی ئەم وەرزە و دەرچوونی لە ئالیانز ئارێنا.
ساشا تاڤۆلیێری رۆژنامەنووس لە رادیۆی مۆنتیکارلۆی فەرەنسی ئاشکرای کردووە کە بەرپرسێکی مانچێستەر یونایتد لەگەڵ بریکارەکەی توخێلدا گفتوگۆی ئەنجامداوە لەبارەی ئەگەری وەرگرتنی پۆستی راهێنەرایەتی شەیتانە سوورەکان لە دوای ئێریک تین هاگ.
🚨 One of the leaders of Manchester United has held talks with Thomas Tuchel’s agent about potentially becoming the new head coach.
(Source: @sachatavolieri) pic.twitter.com/iHu4XbpuDP
— Transfer News Live (@DeadlineDayLive) April 28, 2024
پەرەسەندنی ئەم هەواڵە شتێکی کتوپڕ و چاوەڕواننەکراو نەبوو، بەوپێیەی ماوەی زیاتر لە مانگێکە دەنگۆکە بەنێو راگەیاندنەکاندا دەگوزەرێت.
هەر چەند رۆژێک لەمەوبەریش بوو کریستیان فاڵکی رۆژنامەنووسی بیڵدی ئەڵمانی گەڕانەوەی توخێلی بۆ پریمەرلیگ بڵاو کردەوە.
تۆماس توخێل ئەزموونی لە خولی ئینگلیزی هەیە. ماوەی 2021 – 2022 راهێنەری بلووز بوو. لەو ماوەیەی کە 100 یاری سەرپەرشتی یانە لەندەنییەکەی کرد، سێ نازناوی بۆ بردنەوە: چامپیۆنزلیگ، جامی سوپەری ئەوروپا و جامی جیهانی یانەکان. رێژەی بردنەوەکانی لەگەڵ چێڵسی 60% بوو، بەڵام دواتر هەر جیا بوونەوە و لە مارسی 2023 وەک راهێنەری بایەرن دەستنیشان کرا.
باڤارییەکان بە سەرپەرشتی ئەو راهێنەرە، هەر زوو لە جامی ئەڵمانیا کرانە دەرەوە. لە بۆندسلیگایش یەکێک لە خراپترین وەرزەکانی خۆیان بەڕێکرد کاتێک بە جیاوازییەکی زۆرەوە نازناوەکەیان بۆ لیڤەرکوزن جێهێشت.
هەرچی ئێریک تین هاگی هۆڵەندیە، ئامارەکانی لە توخێل باشتر نییە. ئەمیان تەنانەت سەرکەوتنی بۆ چامپیۆنزلیگی وەرزی داهاتوویش لەدەست داوە. ئەوەی هیوای پێ ماوە وەک دەستکەوت شانازی پێوە بکەن، گەیشتنیانە بە جامی یەکێتی ئینگلتەرا. ئەوەش ئەرکێکی هەروا ئاسان نییە کاتێک رکابەرەکەیان مانچێستەر سیتی دەبێت هاوشێوەی ساڵی پار.
