حکومەتی عێراق کارئاسانی بۆ گواستنەوەی هاندەران بۆ قەتەڕ دەکات

یاریگا –

حکومەتی عێراق کارئاسانی بۆ گواستنەوەی هاندەرانی هەڵبژاردەی عێراق بۆ دەوحە، پایتەختی قەتەڕ دەکات.

وەزارەتی گواستنەوەی عێراق بڵاویکردووەتەوە، لەسەر بڕیاری محەمەد شیاع سودانی، سەرۆکوەزیرانی عێراق، کارئاسانی بۆ گواستنەوەی هاندەران و بە نرخی پاڵپشتیکراو لەلایەن حکومەتەوە دەکرێت.

قۆناخی یەکەمی گواستنەوەی هاندەران لە رۆژانی 15, 18, 19, 20, 24 و 25 دەبێت. بەبێ ئەوەی ناوی هیچ فڕۆکەخانەیەک بهێنێت.

حکومەتی عێراق بەشێک لە نرخی بلیتەکانی گواستنەوەی ئاسمانی لە ئەستۆ دەگرێت و میکانیزمێک بە کۆمەڵێک مەرجەوە دانراوە.

مەرجەکان

1. خوازیار دەبێ هەڵگری پاسپۆرت بێت و شەش مانگ بۆ وادەی بەسەرچوونی مابێت.
2. دەبێ بلیتی چوون و گەڕانەوە لە لقەکانی کۆمپانیای عێراق ئێروەیسی نێو عێراق بکڕدرێن.
3. پێویستە خوازیار کاردی (هەیا)ی هەبێت و بەسەرنەچووبێت، ئەگەر کاردی هەیاشی نەبێت، پێویستە هەڵگری ڤیزای قەتەڕ بێت و هۆتێلی دەستبەرکردبێت.
4. خوازیار ژمارەی مۆبایڵ لە کۆمپانیا جێدەهێڵێت، تاوەکو لەڕێگەی یەکێک لە ئەپلیکەیشنەکانی (واتسئاپ، ڤایبەر، تێلێگرام…هتد) پەیوەندی پێوە بکرێت.