یاریگا
شوهێی ئۆتانی یاریزانی بەیسبۆلی ژاپۆنی بە گرێبەستێکی خەیاڵی کە بەهاکەی 700 ملیۆن دۆلارە، پەیوەندی بە یانەی لۆس ئانجلۆس داجەرزی ئەمریکی کرد، ئەو یاریزانە بووە گرانبەهاترین وەرزشوانی جیهان و هەروەها ریکۆردێکی نوێشی تۆمار کرد.
ماڵپەری گۆڵی جیهانی بڵاویکردەوە، پێش ئەوەی وەرزشوانە ژاپۆنیەکە پەیوەندی بە یانە ئەمریکیەکەوە بکات، لیۆنێل مێسی یاریزانی ئەرجەنتینی یانەی ئینتەر مەیامی ئەمریکا، خاوەنی پر فرۆشترین درێسی وەرزشی جیهانی بوو، بەڵام وەرزشوانە ژاپۆنیەکە ریکۆردەکەی بە ناوی خۆیەوە کرد.
ماڵپەری Fanatics بڵاوی کردەوە لەگەڵ پەیوەندی کردنی شوهێی بە ریزەکانی یانەی لۆس ئانجلۆس، خەڵکانێکی زۆر لە جیهان روویان لە کڕینی درێسی ئەو وەرزشوانە کردووە و لە 48 کاتژمێری سەرەتا، بووە بە خاوەنی ریکۆردی پرفرۆشترین درێسی وەرزشی لە جیهان.
پێشتر کریستیانۆ رۆناڵدۆ کاتێک لە ساڵی 2021 گەڕایەوە ریزەکانی مانچێستەر یونایتد، ریکۆرد پرفرۆشترین درێسی وەرزشی لە جیهان تۆمار کرد، بەڵام دواتر پاش ئەوەی لیۆنێل مێسی پەیوەندی بە ریزەکانی ئینتەر مەیامی ئەمریکا کرد، ئەو یاریزانە بووە خاوەنی ریکۆردەکە.
