کوردستان

یانەی هەولێر گرێبەستی لەگەڵ 2 یاریكەری ئەفریقایی ئیمزا دەكا

سەرچاوەیەك لە راگەیاندنی یانەی هەولێر رای گەیاند كە یانەكەیان ئەمڕۆ چوارشەم گرێبەستی لەگەڵ 2 یاریكەری پیشەگەری ئەفریقایی ئیمزا كردووە.

رێبین رەمزی بە ئاژانسی كوردستان بۆ دەنگوباس (ئاكانیوز)ی راگەیاند، لە درێژەی هەوڵەكانی بەهێزكردنی ریزەكانی یانەی هەولێر بۆ تاسی یەكەتیی یانەكانی ئاسیا لە تۆپی پێ، ئەمڕۆ گرێبەستمان لەگەڵ 2 یاریكەری ئەفریقایی ئیمزا كرد كە ئەوانیش هەریەكە لە دیو باب عەبدوڵای سەنیگالی و سلێمان مستەفای ئۆگەندایین.

زیاتر گوتی، گرێبەستی هەریەكەیان بۆ ماوەی یەك وەرزە و لە یارییەكانی تاسی یەكەتیی یانەكانی ئاسیا و لە وەرزی داهاتووی خولی بژاردەی عێراق یاریی دەكەن.

رەمزی نرخی گرێبەستی ئەو یاریكەرانەی ئاشكرا نەكرد و گوتی، دەستەی كارگێڕیی یانەی هەولێر پێی باشە جارێ نرخی گرێبەستەكان ئاشكرا نەكا.

دیو باب عەبدوڵای سەنیگالی یاریكەری هێڵی ناوەڕاست و بەرگرییە و تەمەنی 27 ساڵە، هەروەها سلێمان مستەفای ئۆگەندایی تەمەنی 20 ساڵە لە هێڵی هێرشبردن یاریی دەكا و لە هەردوو باڵی چەپ و راستیش دەتوانێ بەسەركەوتوویی یاری بكا.

جێی باسە یانەی هەولێر لە ماوەی 3 رۆژی رابردوودا گرێبەستی لەگەڵ 6 یاریكەی تر ئیمزا كرد، كە ئەوانیش پێك هاتوون لە دیار رەحمان، كۆسرەت باییز، میران كەریم، هەردی سیامەند، ولید سالم و ساڵح سدێر.

یانەی هەولێر دوای ئەوەی ئەم وەرزە بۆ جاری چوارەم بووە پاڵەوانی خولی بژاردەی عێراق لە تۆپی پێ، لە ئێستەوە خۆی بۆ یارییەكانی قۆناغ هەشتەمی تاسی یەكەتیی یانەكانی ئاسیا ئامادە دەكا كە بڕیارە مانگی داهاتوو دەست پێ دەكا.

لە: ئەرسەلان عەبدوڵا. نووس: ئامانج ئەكرەم

کۆمێنتێکی نوێ دابنێ

کۆمێنتەکان

تاگ

بابەتی پەیوەندیدار

Back to top button
Close