یاریگا –
شەوی رابردوو لە یارییەکانی قۆناخی کۆمەڵەکانی خولی یانە پاڵەوانەکانی ئاسیا، نەسڕی سعودی لە یاریگای ئەوەل پارک، میوانداری دوحەیلی قەتەری کرد. یارییەکەیشی بە ئەنجامی 4-3 بردەوە.
کریستیانۆ رۆناڵدۆی پۆرتوگالی و براوەی پێنج خەڵاتی باڵۆندۆر، بە کردنی دوو گۆڵی نایاب رۆڵێکی گەورەی گیڕا لە سەرکەوتنە گرنگەکەی نەسڕدا.
دۆن لەوبارەیەوە پاش یارییەکە بەمشێوەیە بۆ میدیاکان دوا:
بەڕاستی پێتان بڵێم من گرنگی بە ژمارە پێوانەییەکان نادەم، من تەنیا چێژ وەردەگرم لەگەڵ نەسڕ، ئامانجمان ئەوەیە تیپەکەمان بکەینە باشترین و بەهێزترین یانە.
هاوکات ئەفسانە پۆرتوگالییەکە گۆڵکاری ساڵی 2023 یە بە کردنی 43 گۆڵ، تاکە یاریزانیشە لەمساڵ توانیوییەتی بەشداری لە کردنی 53 گۆڵدا بکات.
رۆناڵدۆ لەم وەرزە لە سەرجەم پاڵەوانێتییەکاندا لە 13 یاری 14 گۆڵی بۆ نەسڕ کردووە و 7 گۆڵیشی درووستکردووە.
