یاریگا –
ئاندێرسۆن تالیسکا یاریزانی ناوەڕاستی یانەی نەسری سعودی رایگەیاند، چێژ لە یاری کردن لەم تیپە وەردەگرێت و هەواڵی رۆیشتنی لە یانەی نەسر ساختەیە.
ئاندێرسۆن یاریزانی بەڕازیلی یانەی تۆپی پێی نەسر، سەرلەبەیانی ئەمڕۆ لە هەژماری تایبەتی خۆی لە تۆڕی کۆمەڵایەتی ئینستاگرام بەیاننامەیەکی بڵاوکردەوە و رایگەیاند کە بەنیازی ئەوە نییە لەم هاوینەدا تیپەکەی جێبهێڵێت و ئەم هەواڵەی بە “ساختە” وەسفکرد.
یاریزانە تەمەن 29 ساڵەکە لە ستۆری تایبەتی خۆی لە تۆڕی کۆمەڵایەتی ئینستاگرام ئەم لێدوانەی بڵاوکردەوە و نووسیویەتی:
هەموو ئەو شتانەی لەسەر رۆیشتنی من لە نەسر دەگوترێ هەواڵی ساختەیە، بەنیازنیم ئەم یانەیە جێبهێڵم.
لە درێژەی قسەکانیدا نوسیویەتی:
من لێرە کاتێکی خۆش بەسەر دەبەم و چێژ لە هەموو ساتێک وەردەگرم، زۆر دڵخۆشم کە لە نەسرم و بەم دواییە گرێبەستەکەم بۆ ماوەی 3 ساڵ نوێکردەوە.
شایەنی باسە ئەم یاریزانە بەڕازیلییە کە لە وەرزی 2021 گرێبەستی لەگەڵ یانەی نەسر واژۆکرد، وەرزی ڕابردوو گرێبەستەکەی تا ساڵی 2026 درێژکردەوە و تاوەکوو ئێستا لە کۆی 52 یاریدا توانیویەتی 41 گۆڵ تۆمار بکات.
پێویستە ئاماژە بەوە بکرێت کە سبەی چوارشەممە لە قۆناغی پێشکۆتایی جامی شاسەڵمان، یانەی نەسر رووبەڕووی یانەی شورتەی عێراق دەبێتەوە.
