ئیمێرسۆن پاڵمیێری بووە خاوەنی ریکۆردێکی ناوازەی مێژوویی
یاریگا-ئیمێرسۆن پاڵمیێری بەرگریکاری وێستهام شەوی رابردوو بووە تاکە یاریزان لە مێژوودا هەر پێنج ناسناوە فەرمییە ئەورووپییەکەی سەر ئاستی یانە و هەڵبژاردە بباتەوە.
ناوبراو پارساڵ پەیوەندی بەو یانەیەوە کرد و پێشتر لەگەڵ چێڵسی چامپیۆنزلیگ و یۆرۆلیگی بردووەتەوە، دوێنێش لەگەڵ وێستهام جامی کۆنفرانسی بردەوە و بوو بە یەکەم یاریزان بتوانێت هەر سێ خولە ئەورووپییەکە بەدەست بهێنێت.
جگە لەوە ناوبراو جامی سوپەری ئەورووپای بردووەتەوە و لەگەڵ هەڵبژاردەکانیش یۆرۆی ٢٠٢٠ی بردەوە. بەوەش هێندەی تر ریکۆردەکەی ناوازەتر بووە و رەنگە تا ساڵانێکی زۆر هیچ یاریزانێک نەتوانێت تەواوی جامە سەرەکییەکان سەر ئاستی و یانە و هەڵبژاردەکان بباتەوە.
ئیمێرسۆن بە رەگەز بەڕازیلییە بەڵام دواتر بڕیاریدا یاری بۆ هەڵبژاردەی ئیتاڵیا بکات و خاوەنی ٢٢ یاری نێودەوڵەتییە. پاڵمیێری تەواوی ئەو ناسناوانەی لە کۆتا چوار ساڵی رابردوو بردووەتەوە کۆکردووەتەوە بەم جۆرە:
٢٠١٩ : یۆرۆلیگ (چێڵسی)
٢٠٢٠ : یۆرۆ (ئیتاڵیا)
٢٠٢١ : چامپیۆنزلیگ
٢٠٢١: سوپەری ئەورووپا
٢٠٢٣: کۆنفرانس لیگ
