هاندەرانی بایەرن لەسەر نرخی بلیت هێرش دەکەنە سەر پاریس

هاندەرانی بایەرن میونشن توڕەن لەگرانی نرخی بلیتی یاری یانەکەیان بەرامبەر پاریس.

شەوی رابردوو لە میانەی یارییە ئاگرینەکەی نێوان بایەرن و پاریس لە خاکی فەڕەنسادا، هاندەرانی یانەی میوان چەند بانەرێکیان بەرزکردەوە کە لەسەر نوسرابوو “٧٠ یۆرۆ؟ ئێمە نێیمار نین. ٢٠یش زۆرە و نەفرەت لە پاریس سان جێرمان!”.

هاندەرانی بایەرن جیاواز لە یانەکانی دیکە هەمیشە بە کردار رووبەرووی بەرزبوونەوەی نرخی بلیتی یاریگاکان دەبنەوە و بەشێکی گرنگن لە هەڵمەتی “٢٠یش زۆرە” کە هەڵمەتێکی هاندەرانە و داوا دەکەن بلیتی هیچ یارییەک لە ٢٠ یۆرۆ زیاتر نەفرۆشرێت.

بایەرن یارییەکەی ١-٠ بردەوە بەڵام ئاڵۆزی زۆر لەنێو هاندەران و دەرەوەی یاریگا روویداوە، لەلایەک لە نێوان پۆلیس و هاندەرانی بایەرن لەلایەکی دیکەش لە نێوان هاندەرانی هەردوو یانە.