یاریگا–
ئێرلینگ هالاند، هێرشبەری نەرویجی یانەی بورووسیا دۆرتمۆندی ئەڵمانیا، بەهۆی ئاستە بەرزەکەی بووەتە ئامانجی چەندین یانەی گەورەی ئەوروپا و چاوەڕێ دەکرێت هاوینی داهاتوو ریزەکانی یانەکەی جێبێڵێت.
ماڵپەری le10sportـی فەرەنسی بڵاویکردەوە، یاریزانە نەرویجیەکەی زەردەواڵەکان دەیەوێت هاوینی داهاتوو یانەکەی جێبێڵێت و دەنگۆیەکی بەهێزیش هەیە لە نێوان یانەکان ریال مەدرید و بارسێلۆنا یەکێکیان هەڵدەبژێرێت، بەڵام هەوڵێک هەیە کە کارگێری یانەی پاریس سانجێرمان، ئەو یاریزانە وەکو شوێنگرەوەی ئێمباپێ بۆ ریزەکانیان بگوازنەوە.
کلیان ئێمباپێ هێرشبەرە لاوەکەی شازادەکان هاوینی داهاتوو گرێبەستەکەی کۆتایی دێت و تاوەکو ئێستا ئامادەنیە گرێبەستەکەی نوێ بکاتەوە، بۆیە یانەکەی دەیەوێت هالاند وەکو شوێنگرەوەی بگوازێتەوە.
