گرژی لەنێو ماڵی ئەڵمانیا دروست دەبێت؛ یولیان ناگلیسمان دەتوانێت کارەکە بۆ ئەڵمانیا جێبەجێ بکات؟

یاریگا –

لە کاتێکدا ئەڵمانیا بە شکستێکی 2-1 لە بەرامبەر ئیکوادۆر لە دوایین یاریی قۆناخی کۆمەڵەکاندا تووشی نسکۆ بوو، روون بووەوە کە یارییەکی بێبایەخ لە رووی ریزبەندییەوە رەنگە لە راستییدا مانایەکی زۆری هەبێت بۆ بەرەوپێشچوونی ئەم پێکهاتەیە لە داهاتوودا.

لانی کەم سێ یاریزان؛ دێنیز ئونداڤ، یۆشوا کیمیچ و جەمال موسیالا بە ئاشکرا گوتیان کە ئیکوادۆر زیاتر یارییەکەی دەویست، لە کاتێکدا راهێنەری سەرەکی، یولیان ناگلیسمان، رەتی کردەوە کە بابەتەکە بەو شێوەیە بێت. ئەگەرچی زۆر شت لەو یارییەدا هەبوون، بەڵام روون بوو کە لانی کەم جۆرێک لە دابڕان لەنێوان یاریزانەکان و راهێنەردا هەبوو لە شێوازی هەڵسەنگاندنیاندا بۆ یارییەکە.

پێش یارییەکە، مشتومڕێکی توند هەبوو لەسەر ئەوەی ناگلیسمان چۆن مامەڵە لەگەڵ یارییەکەدا بکات، پشوودان بە یاریزانە سەرەکییەکانی و هێنانەناوەی هەندێک یاریزانی دیکە کە پێویستیان بە کاتی یاریکردن لە یاریگا هەبوو… یان هەوڵدان بۆ بنیاتنانی پەیوەندی لەگەڵ 11 یاریزانی سەرەکیدا، کە لە راستییدا رێکخستنیان کەم بوو؟ لە کۆتاییدا، ناگلیسمان بڕیاری نیوەچڵیدا لە رێگەی بەکارهێنانی زۆربەی یاریزانە سەرەکییەکانی و لە کۆتاییدا هێنانی دێنیز ئونداڤ و مالیک تیاو وەکوو جێگرەوە لە خولەکی 60.

ئەمەش بووە هۆی لەدەستدانی چانسی بنیاتنانی پەیوەندییەکی گەورەتر، بێگومان ئەوە کارێکی قورس بوو کاتێک 11 یاریزانی سەرەکی بە تەواوی ئاستیان لە خوار رکابەرەکەیانەوە بوو. دوای 60 خولەک لە یاریی هێرشبەریی ناڕێک، پشێوی لە هێڵی ناوەڕاست و سەرلێشێواوی بەردەوام لە هێڵی بەرگریدا، هیچ شتێک نەگۆڕا. لە راستییدا، لەوانەیە خراپتریش بووبێت.

لە راستییدا، تەواوی ئەو هەوڵە لاوازە تەنیا بووە هۆی پرسیاری زیاتر کە هەندێکیان پێشتریش چەندین جار کراون، لەوانە:

• تیمەکە چۆن دەبوو ئەگەر ئونداڤ یارییەکی تەواوی پێبدرایە بۆ دروستکردنی مەترسی؟

• چی دەبوو ئەگەر بەرگریکارێکی راستی راستەقینە لە لیستەکە هەبووایە کە رێگەی بە کیمیچ بدایە هێڵیێکی ناوەڕاستی لاواز، بەهێز بکات؟

• چی دەبوو ئەگەر باڵێکی هێرشبەری راستەقینەی دیکە لە پێکهاتەکەدا هەبووایە، تاوەکوو ناگلیسمان نەیتوانیبایە ئەو بەهانەیە بەکاربهێنێت کە هیچ یاریزانێکی دیکە هەمان پرۆفایلی لێرۆی سانێی نییە؟

• چی دەبوو ئەگەر تەنیا یەک راهێنەری ئەڵمانی هەبووایە کە شەیدای بیرۆکەی ئەوە نەبووایە کای هاڤێرتز دەکرێت ببێتە چی، لەبری ئەوەی سەیری ئەوە بکات کە ئێستا چییە؟

زۆرێک لە چاودێران ئاماژە بە بێبایەخی یارییەکە دەکەن (لە رووی پێگەی ریزبەندییەوە)، بەڵام ئەڵمانیا بە زۆری خاوەن پاڵنەر یان بە تەواوی ئامادەکراو دەرنەکەوت. دیسانەوە، دەکرێت چاوپۆشی لەو شتانە بکرێت لە یەک یاریی نائاساییدا، بەڵام پێدەچێت کێشەکان زۆر زیاتر بن لە تەنیا یارییەکی خراپ لە بەرامبەر ئیکوادۆر.

ئەو تیمەی کە ناگلیسمان کۆی کردووەتەوە کەمکوڕی تێدایە. ئەو بڕیارانەی ناگلیسمان لەسەر یاریزانە سەرەکییەکانی داونی زۆر جێگەی گومانن. باشترە ستراتیژیی داهاتوو باش بێت، چونکە ئەگەری رووبەڕووبوونەوەیەک بەرامبەر فەرەنسا لە قۆناخی 16 نزیکە.

بەگوێرەی بێڵد، دۆخەکە لەنێو کەمپی ئەڵمانیادا تاوەکوو دێت زیاتر گرژ دەبێت. سەرچاوەکە ئاماژە بەوە دەکات کە یاریزانەکان داوای روونیی زیاتر لە راهێنەری تیمی نیشتمانی دەکەن سەبارەت بە پلانی یارییەکە، ئەمەش پێش رووبەڕووبوونەوەی ئەمشەوی قۆناخی 32 بەرامبەر پاراگوای، لە کاتژمێر 23:30 بە کاتی هەولێر.

هاوکات بێڵد بانگەشەی ئەوە دەکات کە تیمەکە لە یولیان ناگلیسمان دوورکەوتووەتەوە و کارلێکێکی زۆر کەمی لەگەڵ یاریزانەکانیدا هەیە. وەکوو دەگوترێت، یاریزانەکان بە کۆنفرانسە رۆژنامەوانییەکەی ئەو سەرسام بوون، کە تێیدا رایگەیاند پاش شکستەکەی بەرامبەر ئیکوادۆر، گۆڕانکاریی زۆر کەم لە پێکهاتەی سەرەکیدا دەکات.

خراپترین ئەو خەسڵەتانەی لە سەردەمی ناگلیسمانەوە بە بیرمان دێنەوە لە کاتێکی نەگونجاودا سەریان هەڵداوەتەوە. ئایا ئەو هێشتا ئەو پیاوەیە کە خاوەن پلان بێت بۆ سەرکردایەتیکردنی ئەڵمانیا بەرەو خاکی بەڵێندراوی نازناوی مۆندیال… یاخود ئەو تەنیا چارەسەرێکی کاتییە تاوەکوو کەسێکی باشتر (یوورگن کلۆپ؟) دێتە پێشەوە؟