یاریگا –
میشێل پلاتینی، ئەفسانەی پێشووی تۆپی پێی فەرەنسا و سەرۆکی پێشووی یەکێتیی تۆپی پێی ئەوروپا، سکاڵایەکی یاسایی و تاوانکاری لە دژی جیانی ئینفانتینۆ، سەرۆکی ئێستای فیفا تۆمار کردووە.
تۆڕی سکای سپۆرتس بڵاویکردووەتەوە، پلاتینی، بەفەرمی لە رێگەی پارێزەرەکانی لە پاریس سکاڵایەکی تاوانکاریی نوێی لە دژی ئینفانتینۆ، تۆمار کرد.
ئەم هەنگاوە تەنیا دوو رۆژ پێش دەستپێکردنی یارییەکانی مۆندیالی 2026 دێت، کە بڕیارە ئینفانتینۆ لەگەڵ دۆناڵد ترەمپ، سەرۆکی ئەمریکا لەسەر شانۆیەکی سیاسی پێکەوە دەربکەون.
BREAKING: FIFA president Gianni Infantino subject of criminal complaint from his former UEFA boss Michel Platini 🚨 pic.twitter.com/CuxEyWshuj
— Sky Sports News (@SkySportsNews) June 9, 2026
پشت پەردەی تۆمەتەکان؛ پیلانگێڕی بۆ رێگریکردن لە سەرۆکایەتی
پلاتینی لە سکاڵاکەیدا تەنیا ئینفانتینۆی نەکردووەتە ئامانج، بەڵکوو پێنج بەرپرسی دیکەی داواکاری گشتی و بەرپرسانی پێشووی تۆپی پێی سویسرای تۆمەتبار کردووە. پلاتینی ئاشکرای کردووە کە پیلانگێڕییەک لە رێگەی تێوەگلاندنی بە تۆمەتی درۆ و بەکارهێنانی هەژموون لە دژی کراوە، تەنیا بۆ ئەوەی دە ساڵ لەمەوبەر رێگری لێبکەن ببێتە سەرۆکی فیفا.
لە هاوڕێیایەتی یوێفاوە بۆ دادگاکانی پاریس
پێش تەقینەوەی کێشەکان، پلاتینی بەربژێری سەرەکی بوو بۆ گرتنەدەستی پۆستی سەرۆکایەتی فیفا وەکوو جێگرەوەی سێپ پلاتەر. لەو سەردەمەدا، ئینفانتینۆ بۆ ماوەیەکی درێژ سکرتێری گشتیی پلاتینی بوو لە یوێفا، بەڵام دوای دوورخستنەوەی پلاتینی، ئینفانتینۆ وەکوو بەربژێرێکی چاوەڕواننەکراو هاتە پێشەوە و لە ساڵی 2016 بە سەرۆکی فیفا هەڵبژێردرا.
ئەم دۆسیەیە دوای ئەوە دێت کە پلاتینی و پلاتەر لە ساڵی 2015 بەهۆی پێدانی بڕی 2 ملیۆن فرانکی سویسری بە پلاتینی، لە پۆستەکانیان دوورخرانەوە، بەڵام پلاتینی لە ساڵی 2022 و دواتریش لە ساڵی رابردوو لە دادگاکانی سویسرا لەو تۆمەتانە بە تەواوی بێبەری کرا [بردنەوەی داواکە لە تێهەڵچوونەوەدا]. ئێستاش جیا لە سکاڵا تاوانکارییەکە، پارێزەرانی پلاتینی داوای قەرەبووی دارایی گەورە لە فیفا دەکەن.
