یاریگا–
کۆستاس مانۆلاس، بەرگریکاری یونانی یانەی ناپۆلی ئیتاڵیا دوای دوو ساڵ جارێکی دیکە لە چامپیۆنزلیگ یاری بەرامبەر بارسێلۆنا دەکات.
بەرگریکاری یانەکەی باشووری ئیتاڵیا لە چاوپێکەوتنێکدا باس لە رووبەرووبونەوەی یانەی ئیسپانیەکە دەکات و دەڵێت ” ئەو شەوە هەرگیز لە بیر ناکە کاتێک توانیمان لەگەڵ یانەی رۆما ریمۆنتادا بەسەر بلاوگرانا بێنین و کە لە هەمووی بە چێژتریش گۆڵەکەی من بوو کە بووە هۆی سەرکەوتنی یانەکەمان، هیوادارم ئەمجارەش بتوانین ئەو یادگارییە دوبارە بکەینەوە و بردنەوە بەدەست بێنین “.
مانۆلاس لە لێدوانەکەیدا ئەوەی نەشاردەوە کە ئەرکیان بەرامبەر میسی هاوڕێیانی قورس دەبێت، بەڵام لە هەمان کاتدا بڕوایان هەیە کە بردنەوە بەدەست دێنن.
