کاروانە پڕ ئەستێرەکەی هیلال بەرەو تاران بەڕێ کەوت

یاریگا –

گەشتە تایبەتەکەی هیلالی سعودی ئەمڕۆ لە فڕۆکەخانەی تاران دەنیشێتەوە.

یانەی هیلال بە ئامادەبوونی نێیمار جونیۆر ئەمڕۆ بەرەو تاران بەڕێدەکەوێت و گەشتی ئەم تیپە لە ریازەوە بەرەو تاران هەڵدەستێت. هاوکات تیمی هیلال ئەمڕۆ یەکشەممە دەگاتە تاران، بەڵام بۆ رێگریکردن لە کۆبوونەوەی بینەران و هاندەران، ناوی فڕۆکەخانەکە ئاشکرا ناکرێت.

بێگومان رێوشوێنی ئەمنی بەهێز گیراوەتەبەر بۆ ئەوەی ئەستێرەکانی هیلال بچنە ناو تاران، بەڵام لە هەر حاڵەتێکدا ئامادەبوونی نێیمار جونیۆر دەبێتە هۆی ئەوەی ژمارەیەکی زۆر لە هاندەران لە فڕۆکەخانە و لە هۆتێل ئامادە ببن.

بە لەبەرچاوگرتنی ئەو کێشانەی کە لە کاتی سەفەری تیمی نەسر بۆ تاران روویان دا، یانەی هیلال هەوڵ دەدات ئەم گەشتە بە باشترین شێوە و بەبێ دەنگی بەڕێوە بچێت.

یاریگای ئازادی کە میوانداریی یارییەکانی خولی یانە پاڵەوانەکانی ئاسیا بۆ تیپەکانی پێرسپۆلیس و نەساجی دەکات، یەکێک لە نیگەرانییەکانی ئێستای تۆپی پێی ئێرانە، بەرپرسانی ئەو وڵاتەش پلانیان هەیە یاریگای ئازادی بگەیەننە بارودۆخێکی باشتر بۆ کێبڕکێکانی ئاسیا و ناوخۆ.

بارودۆخی چیمەنی یاریگای ئازادی کە یارییەکەی نەسر و پێرسپۆلیسی تێدا بەڕێوەچوو، زۆر خراپ بوو و بووە هۆی ئەوەی یاریزانانی هەردوو یانەکە رەخنەی زۆر لە چیمەنی یاریگاکە بگرن و کریستیانۆ رۆناڵدۆ سەبارەت بەم بابەتە زۆر ناڕازی دەردەکەوت.

هەر لەبەر ئەم هۆکارانە یانەی نەساجی دەستی بە نۆژەن کردنەوەی چیمەنی یاریگاکە کردووە و ئێستا چیمەنەکە بۆ یاری کردنی ئەستێرەکانی هیلال لەبار بووە.

شایەنی باسە یاری نێوان نەساجی و هیلال لە یاریگای ئازادی رۆژی سێشەممە کاتژمێر 19:00 دەست پێدەکات و بەدەستهێنانی تەنانەت یەک خاڵیش لەم یارییە یارمەتی مازەندەران دەدات سەرکەوێت بۆ قۆناخی داهاتوو.