كیسێ بووەتە ئامانجی یانەی یوڤێنتوس

یاریگا –

ئەگەری ئەوە هەیە لە هاوینی داهاتوودا فرانک کیسێ ناوەڕاستکاری کۆتدیڤواری بارسێلۆنا ریزەکانی یانەکەی بەجێبهێڵێت.

میگێل سانز لە رۆژنامەی سپۆرتی کەتەلۆنی دەڵێت، یانەی یوڤێنتوس فرانک کیسی یاریزانی 26 ساڵی کۆتدیڤواری خستووەتە لیستی کڕیارەکانی و دەیەوێت لە هاویندا گرێبەستی لەگەڵ بکات.

دوای دڵنیابوونی بەرپرسانی یانە ئیتاڵیاکە لە گەڕانەوەی لیاندرۆ پارێدێس بۆ پاریس سان جێرمان، بیانکۆنێری یاریزانەکەی پێشوی میلان بە بژاردەیەکی سەرنجڕاکێش دەزانێت بۆ دووبارە بنیاتنانەوەی هێڵی ناوەڕاستی یانەکەی.

خانمە پیرەکە تاکە یانە نییە لەو کێبڕکێیەدا، تۆتنهام و ئینتەرمیلانیش لەم چەند مانگەی دواییدا بەردەوام بەدوای پێگەی ئەودا دەگەڕێن. پلانی یوڤی بۆ گواتسنەویە کیسێ ئەوەیە کە ئاڵوگۆڕی یاریزان + پارەی کاش پێشکەش بە بارسێلۆنا بکات.