حکومەتی کەتەلۆنیا وەڵامی ریال مەدرید دەداتەوە

یاریگا –

دوای بڵاوکردنەوەی گرتە ڤیدیۆیەک لەلایەن یانەی ریال مەدرید وەکو وەڵامدانەوەی قسەکانی خوان لاپۆرتا سەرۆکی بارسێلۆنا، حکومەتی کەتەلۆنیا بە توندی دێتە دەنگ و داوا دەکات ئەو گرتە ڤیدیۆیە بسڕێتەوە. 

دوای ئەوە یانە شاهانەکە لەو گرتە ڤیدیۆیەی بڵاویکردەوە و ئاماژەی بەوەدا لەسەردەمی جەنەراڵ فرانکۆ هاوکاری زۆری خەڵکی کەتەلۆنیا کراوە، حکومەتی هەرێمەکە داوا دەکات ئەو گرتە ڤیدیۆیە بسڕێتەوە و پاتریسیا پلایا ووتەبێژی هەرێمەکە لەمبارەوە دەڵێت:

پێمان خۆشە ڕیال مەدرید ئەو ڤیدیۆیە بسڕێتەوە، ئەمە نابەرپرسیارێتییەکی ئاشکرا و سوکایەتیکردنە بەو هەزاران کەسەی کە لە سەردەمی ڕژێمی فرانکۆدا ئازاریان چەشتووە

پەیوەندیەکانی نێوان هەردوو یانەی بارسێلۆنا و ریال مەدرید لەسەر کەیسی نیگێرای ناوبژیوان گەیشتووەتە ئاستێکی خراپ و ساڵانێکە پەیوەندیەکانیان بەمجۆرە خراپ نەبووە.