ریال مەدرید و یانەیەکی پرێمەرلیگ شەڕ لەسەر چوامینی دەکەن

یاریگا –

ریال مەدرید بە هیچ شێوەیەک بیری لە چوونە دەرەوەی ئۆرێلیەن چوامینی نەکردووەتەوە.

رۆژنامەی AS بڵاویکردووەتەوە، ریال مەدرید بڕیاریداوە گوێ لە هیچ ئۆفەرێکی پێشکەشکراو بە چوامینی نەگرێت، تەنانەت باس لە نوێکردنەوەی گرێبەستەکەشی دەکرێت.

چوامینی، ئەستێرەی هێڵی ناوەڕاستی فەرەنسا لە هاوینی رابردوو بە بڕی 80 ملیۆن پاوەند لە مۆناکۆوە پەیوەندی بە ریال مەدرید کرد، ئێستا چەندین یانەی گەورەی وەک لیڤەرپوول و مانچێستەر سیتی چاودێری دۆخەکەی دەکەن.

هەرچەندە ریال مەدرید پارەیەکی زۆری لە پێناو گواستنەوەی چوامینی خەرجکردووە، بەڵام تاوەکو ئێستا تەنیا بەشداری لە 18 یاری لالیگادا کردووە، ئەمەش پرسیاری لەسەر داهاتووی یاریزانە فەرەنسییەکە دروستکردووە.

تۆنی کروس و لوکا مۆدریچ، بژاردەی سەرەکی کارلۆ ئانچێلۆتین، بە ئەگەرێکی گەورەشەوە، بۆ وەرزی داهاتووش، مۆدریچ و کروس لە شوێنەکانی خۆیان دەمێننەوە، بەمەش گۆڕانکارییەکی ئەوتۆ بەسەر ژمارەی بەشدارییەکانی چوامینی نایەت.

بە هۆی کەمی بەشدارییەکانی چوامینی لە ژێر سەرپەرشتی ئانچێلۆتی، لیڤەرپوول کەوتووەتە خۆی و دەیەوێت یاریزانی تەمەن 23 ساڵان پەلکێشی ئانفیڵدڕۆد بکات.

لیڤەرپوول لە کێبڕکێی بەدەستهێنانی واژۆی جود بێڵینگهام کشاوەتەوە، ئێستا سەرنجی تەواوی لەسەر چوامینی داناوە.