یاریگا –
ریال مەدرید لە دەستنیشانکردنی ناوبژیوانی کلاسیکۆ نیگەرانە.
رۆژنامەی مارکا بڵاویکردووەتەوە، دەستەی کارگێڕی ریال مەدرید لە دانانی مارتینێز مۆنوێرا و خۆسێ لویس گۆنزالێس بۆ بەڕێوەبەردنی یاری کلاسیکۆ لە یاری گەڕانەوەی قۆناخی پێشکۆتایی جامی شای ئیسپانیا، نیگەرانە.
ریال مەدرید سبەی چوارشەممە، دەبێتە میوانی بارسێلۆنا و پێویستی بە بردنەوەی یارییەکەیە، دوای دۆڕانی یاری چوون بە ئەنجامی 1-0 لە سانتیاگۆ بێرنابیۆ.
رۆژنامەکە روونیکردووەتەوە، پێشتر ریال مەدرید لەلایەن ئەم ناوبژیوانانەوە، ستەمیان لێکراوە و لەڕێگەی کەناڵی ریال مەدریدەوە، چەندین هەڵەی ناوبژیوانەکانیان لە دژی ریال مەدرید پەخش کرد.
کەناڵی ریال مەدرید باسی لە چۆنیەتی بەڕێوەبردنی چەند یارییەکی لەلایەن مۆنوێراوە کرد و چۆن زیانی بە یانەکە گەیاندووە. مۆنوێرا لە یارییەکی وەرزی 2020-2021 ناوبژیوانی یاری نێوان ریال مەدرید و سێڤییا بوو، ئەو یارییە بووە هۆی لەدەستدانی نازناوی لالیگا. کەناڵی ریال مەدرید بە بەڵگەی ڤیدیۆییەوە شەش هەڵەی ناوبژیوانەکەی بڵاوکردووەتەوە.
ریال مەدرید هەموو هەوڵێک بۆ بردنەوەی یاری گەڕانەوەی قۆناخی پێشکۆتایی جامی شای ئیسپانیا دەدات، چونکە لەم وەرزەدا هیچ یارییەکی لە بارسێلۆنا نەبردووەتەوە.
بارسێلۆنا بە جیاوازی 12 خاڵ لەگەڵ ریال مەدرید لە پلەی یەکەمی لالیگا دێت و هەنگاوێک لە یاری کۆتایی کۆپا دێل رێی دوورە.
