مانچێستەر سیتی 90 ملیۆن پاوەند بۆ ئەستێرەیەکی بارسا ئامادە دەکات

یاریگا –

مانچێستەر سیتی بیر لە گواستنەوەی ئانسو فاتی دەکاتەوە.

فووتبۆڵ ئینسایدەر بڵاویکردووەتەوە، یاریزانی تەمەن 20 ساڵان لە کەمی بەشدارییەکانی لەگەڵ بارسا نیگەرانە، هەفتەی رابردوو باوکی فاتی بە ئاشکرا، نیگەرانییەکانی بۆ کەمی بەشدارییەکانی فاتی لەگەڵ بارسا راگەیاند.

بە گوێرەی راپۆرتەکە بێت، فاتی دەیەوێت لە بارسێلۆنا بمێنێتەوە، بەو مەرجەی گەرەنتی بەشداریکردنی زیاتری پێ بدرێت، ئەگەر مەرجەکەی قبوڵ نەکرێت، ناچارە بیر لە یانەیەکی پرێمەرلیگ بکاتەوە.

بارسێلۆنا بە کەمتر لە 90 ملیۆن پاوەند دەستبەرداری فاتی نابێت، چونکە بارسا دەیەوێت سوود لە پارەکە وەربگرێت، بۆ چارەسەرکردنی قەیرانی دارایی بلوگرانا.

گرێبەستی فاتی لە هاوینی ساڵی 2027 بەسەر دەچێت و مەرجی هەڵوەشاندنەوەی گرێبەستەکەشی دەگاتە یەک ملیار پاوەند.

بارسێلۆنا دەتوانێت کەیسی فاتی بە بەدەستهێنانی خزمەتەکانی ئیلکای گوندۆگان ببەستێتەوە، چونکە یانە کاتالۆنییەکە دەیەوێت بۆ ماوەی دوو وەرز، گرێبەست لەگەڵ گوندۆگان بکات.

گرێبەستی گوندۆگان دوای دوو مانگی دیکە بەسەر دەچێت، بارسێلۆناش چاوی لەسەر ئەو یاریزانانەیە کە گرێبەستەکانیان بەسەرچووە.