چێڵسی چاودێری باڵدی دەکات

یاریگا –

چێڵسی چاودێری دوایین پێشهاتەکانی گرێبەستەکەی باڵدی دەکات لەگەڵ بارسێلۆنا، ئارەزووی هەیە یاریزانەکە بگوازێتەوە ستامفۆرد بریدج.

بلوز لە دوو بازاڕی گواستنەوەی رابردوو ژمارەیەکی پێوانەیی تۆمارکرد لە پرێمەرلیگ بە خەرجکردنی بڕە پارەیەکی زۆر، گراهام پۆتەر بەنیازە لە گواستنەوەی هاوینە جارێکی دیکە پارەیەکی زۆر بە یانەکە خەرج بکات.

راهێنەرەکەی چێڵسی دەیەوێت لە سەرجەم هێڵەکانی یاریگا پێکهاتەی تیپەکەی بەهێز بکات بەر لە دەستپێکی وەرزی 2023/2024، بە ئامانجی ئەوەی نازناوێکی گەورە بۆ یانەکە بەدەستبهێنێت.

بەپێی راپۆرتێکی رۆژنامەی سپۆرت بارسێلۆنا تووشی گرفت بووە لە نوێکردنەوەی گرێبەستی یاریزانە ئیسپانییەکەی بەهۆی کێشە داراییە بەردوامەکانی یانەکە.

ئەلێخاندرۆ باڵدیش دەیەوێت لە یانەکە بمێنێتەوە، بەڵام گفتوگۆکانی نوێکردنەوەی گرێبەستی بەرگریکارە 19 ساڵانییەکەی بارسا وەستاوە و هیچ بەرەوپێش چوونێکی بەخۆیەوە نەبینیووە.

بەپێی راپۆرتەکەی سپۆرتی کەتەلۆنی ئەگەر یانە ئیسپانییەکە ئاسانکاری بۆ باڵدی نەکات ئەوا نوێکردنەوەی ئەم گرێبەستە سەرکەوتوو نابێت، کە لە هاوینی ساڵی 2024 کۆتایی دێت.

لەلای خۆیەوە راهێنەرەکەی بلوز باڵدی بە شوێنگرەوەیەکی گونجاو دەزانێت بۆ جێگای بن چیلوێل، کە ئەو بەرگریکارە ئینگلیزییە تا ئێستا نەبووەتە یاریزانی دڵخوازی راهێنەرەکەی.