فیل فۆدێن بەهۆی نەخۆشی ماوەیەک لە یاریگاکان دادەبڕێت

یاریگا
فیل فۆدێن، هێرشبەری هەڵبژاردەی ئینگلتەڕا و یانەی مانچێستەر سیتی ئەم وڵاتە بەهۆی هەوکردنی ریخۆلە باریکە، کامپی مەشق و راهێنانەکانی هەڵبژاردەکەی جێهێشت.

ماڵپەر talkSPORT بڵاویکردەوە هێرشبەرەکەی سێ شێرەکان لە دوایین یەکەی ئامادەکاری هەڵبژاردەی وڵاتەکەی بۆ یاریی بەرامبەر ئۆکرانیا لە پاڵاوتنەکانی یۆرۆی 2024، بەهۆی هەوکردنی ریخۆلە باریکە هەستی بە ئازارێکی زۆر کردووە، هەربۆیە بە ناچاری کامپی ئامادەکاری هەڵبژاردەکەی جێهێشتووە و بەم هۆیەوە بەشداری یاریی ئەمشەوی هەڵبژاردەکەی، هەروەها بەشداری یاریی یانەکەی لە پرێمەرلیگ بەرامبەر لیڤەرپوول ناکات.

فیل فۆدێن لە یاریی یەکەمی هەڵبژاردەی ئینگلتەڕا بەرامبەر ئیتاڵیا لە پاڵاوتنەکانی یۆرۆی 2024، خولەکی 69 لە شوێنی جاک گریلیش بەشداری یارییەکەی کرد، بەڵام بەهۆی ئازار نەیتوانی لە یاریکردن بەردەوام بێت و خولەکی 81 واتە دوای تەنها 10 خولەک یاریگای جێهێشت.