یاریگا-
فێدراسیۆنی تۆپی پێ ئیسپانیا ریکاردۆ دێ بورگۆس وەکو ناوبژیوانی یاریی کلاسیکۆی نێوان یانەکانی بارسێلۆنا و ریال مەدرید دیاریی کرد. هەردوو یانەی یەک شەممەی داهاتوو کاتژمێر 23:00 بەکاتی هەولێر لە گەڕی 26 لالیگا و لە یاریگای کامپ نۆ رووبەڕووی یەکتری دەبنەوە.
ماڵپەری فەرمی فێدراسیۆنی تۆپی پێ ئیسپانیا بڵاویکردەوە، دوای راوێژ کردن لەگەڵ ئەندامەکانیان بڕیاریاندا کە ریکاردۆ وەکو ناوبژیوانی یاریی کلاسیکۆی هەفتەی داهاتوو دیاریی بکرێت، ناوبراو ئەم وەرزە 15 یاریی لە لالیگا بەڕێوە بردووە و سێ یاریی بلاوگرانای بەڕێوە بردووە کە لەو سێ یارییە ئەو یانەیە هەرسێ یاریی بردووەتەوە، هەروەها یارییەکی شاهانەکانیش بەرێوەبردووە و لەو یارییە شاهانەکان بردنەوەیان بەدەستهێنا.
ریکاردۆی ناوبژیوانی 37 ساڵی لەدایکبووی شاری بیلباو پێشتر بە گشتی 25 یاریی بارسێلۆنای بەڕێوەبردووە، لەو یارییانە بارسا 20 یاریی بردووەتەوە و لە 4 یاریی دۆڕاوە، هەروەها بۆ ریال مەدریدیش بە هەمان شێوەی 20 یاریی ناوبژیوانی کردووە و شاهانەکانیش خاوەنی 15 بردنەوە و 2 دۆڕانن. ئەو ناوبژیوانو دوو جار یاریی کلاسیکۆی بەڕێوە بردووە، جاری یەکەمیان ساڵی 2017 لە یاریی کۆتایی جامی سوپەری ئیسپانیا بوو، ئەو کات ریال مەدرید یارییەکەی بە ئەنجامی 3-1 بردەوە. جاری دووەمیش ئەمساڵ لە هەمان قۆناغی جامی سوپەر بوو و ئەمجارەیان بارسێلۆنا یارییەکەی بە ئەنجامی 3-1 بردەوە.