یاریگا
هەردوو یانەی ریال مەدرید و بارسێلۆنا لە یاریی چوونی قۆناغی پێشکۆتایی جامی شای ئیسپانیا رووبەڕووی یەکتری بونەوە و بلاوگرانا توانی یارییەکە بەئەنجامی 1-0 بباتەوە.
یارییەکە لە یاریگای سانتیاگۆ بیرنابیۆ لە مەدریدی پایتەختی ئیسپانیا بەڕێوەچوو و یانە کەتەلۆنیەکە بەبێ کۆمەڵێک لە یاریزانە سەرەکیەکانی پێینایە مەیدانەکە. دوای تێپەڕبوونی 26 خولەک بەسەر یارییەکە، ئێدێر ملیتاو بەرگریکاری خاوەن یاریگا، تاکە گۆڵی یارییەکە بە هەلە لە تیپەکەی کرد. دوای ئەم گۆڵە یاریزانانی مێرنگی زۆر هەوڵیاندا بۆ ئاوەژۆ کردنی ئەنجامی یارییەکە، بەڵام هەوڵەکانیان بێ سوود بوون و تووشی دۆڕان بوون.
بەم شێوەیە چاڤی هێرناندێز راهێنەری بارسێلۆنا، لە چوارەم رووبەڕووبونەوەی بەرامبەر کارلۆ ئانچێلۆتی راهێنەری ریال مەدرید، توانی سێیەم بردنەوە لە کلاسیکۆ بەدەست بێنێت.
هەردوو یانەی ریال مەدرید و بارسێلۆنا بڕیارە لە پێناو یەکلایی کردنەوەی بلیتی یاریی کۆتایی جامی شای ئیسپانیا، 19 ئەم مانگە لە یاریگای کامپ نۆ لە یاریی گەڕانەوە رووبەڕووی یەکتری دەبنەوە.
