ئەنچیلۆتی: هیلال خاوەنی بەهرەیەكی زۆرە و رێزیان لێدەگرین
یاریگا
كارلۆ ئەنچیلۆتی، راهێنەری ئیتاڵی یانەی ریال مەدریدی ئیسپانی باس لە رووبەڕووبوونەوەكەیان بەرامبەر هیلالی سعودی دەكات.
وا بریارە سبەینێ شەممە كاتژمێر 22:00 بە كاتی كوردستان هەردوو یانەی ریال مەدرید و هیلال رووبەڕووی یەك ببننەوە، لە میانەی یاری كۆتایی جامی جیهانی یانەكان.
ریال مەدرید بە بردنەوەیان لە ئەهلی لە قۆناخی پێش كۆتایی بە ئەنجامی چوار گۆڵ بەرامبەر گۆڵێك و هیلالیش بە بردنەوەیان لە فلامینگۆ بە ئەنجامی سێ گۆڵ بەرامبەر دوو گۆڵ توانیان خۆیان بگەیەننە یاری كۆتایی جامەكە.
لە كۆنگرەی رۆژنامەوانی پێش یارییەکەیان بەرامبەر هیلال ئەنچیلۆتی ووتی
بردنەوەی جامی جیهانی یانەکان خەونێک دەبێت، هەموو هەوڵێک دەدەین بۆ بەدەستهێنانی.
ناتوانین چاوەڕێی یاری کۆتایی سبەینێ بكەین، دەبێت چێژ لە یارییەکە وەربگرین، ئێمە برسی بردنەوەین.
هیلال یانەیەكی زۆر باشە و یاریزانی بەتوانا و بە ئەزمونی زۆریان هەیە، رێزیان لێ دەگرین.
یارییەکەی سبەی بۆ ئێمە زۆر گرنگە، جامی جیهانی یانەکان پاڵەوانێتیەکی تایبەتە، چونکە بە دەگمەن چانسی یاریکردنت دەستدەکەوێت.
یاریكردنی بێنزیما و میلیتاو پەیوەستە بەو مەشق و راهێنانەی ئەمڕۆ ئەنجامی دەدەن، ئەوان چانسی یاریكردنیان هەیە.
