تەنها ١٤ یاریزانی پۆرتوگال دەگەڕێنەوە وڵاتەکەیان

یاریگا-ژمارەیەک یاریزانی هەڵبژاردەی پۆرتوگال لە نێویاندا کریستیانۆ رۆناڵدۆ لەگەڵ شاندی فەرمی یانەکە ناگەڕێنەوە وڵاتەکەیان پاش ماڵئاواییان لە جامی جیهانی.

شەوی رابردوو، پۆرتوگال بە گۆڵێکی بێ وەڵام دۆڕا بە مەغریب و لە جامی جیهانی قەتەڕ کرایە دەرەوە. ئەمڕۆش یەکێتی تۆپی پێی پۆرتوگال رایگەیاند تەنها ١٤ یاریزان لەگەڵ شاند و ستافی هەڵبژاردەکە دەگەڕێنەوە وڵاتەکەیان.

لە پاڵ رۆناڵدۆ، هەریەک لە بێرناردۆ سیلڤا، برونۆ فێرناندێز، دیۆگۆ دالۆت، روبن نێڤێس، روی پاتریسیۆ، رافایل گێرێرۆ، رافایل لیاو، جواو کانسیلۆ، ماهیوس نونێس لە قەتەڕ دەمێننەوە.

هەرچەندە هۆکارەکەی باسنەکراوە بەڵام پێدەچێت بۆ خۆ پاراستن لە رووبەروبوونەوەی هاندەران بێت لە فڕۆکەخانە پاش بێ هیواکردنیان و دۆڕان بە مەغریب.

دوای چەند رۆژێک پشوو دەبێت سەرجەم یاریزانان پەیوەندی بە یانەکانیان بکەنەوە بەڵام رۆناڵدۆ هیچ یانەیەکی نیە بۆی بگەڕێتەوە.