دێ تۆماس چاوەڕێ پەیوەندی بەرپرسانی ریال مەدریدە
یاریگا–
رائول دێ تۆماس، هێرشبەری ئیسپانی یانەی ئیسپانیۆل دەیەوێت پەیوەندی بە ریزەکانی یانەی ریال مەدرید بکات و، چاوەڕێ پەیوەندی بەرپرسانی ئەو یانەیە دەکات.
رۆژنامەی ئاسی وەرزشی ئیسپانی بڵاویکردەوە، شاهانەکان دەیانەوێت بۆ وەرزی داهاتوو هێرشىەرێک وەکو هاوکاری کەریم بێنزێما بۆ ریزەکانیان بگوازنەوە، بۆ ئەم مەبەستەش بیریان لەوە کردووەتەوە هێرشبەرەکەی پێشووی یانەکەیان لە یانە کەتەلۆنیەکە بگوازنەوە و خودی ئەو یاریزانەش ئارەزوو دەکات درێسی یانەکەی پێشووی لەبەر بکاتەوە و چاوەڕێ پەیوەندی یانەکەی پێشوویەتی.
تۆماس پێگەیشتووی ئەکادیمیای یانەی ریال مەدریدە و لە ساڵی 2019 بەرامبەر 25 ملیۆن یۆرۆ پەیوەندی بە یانەی بێنفیکا کرد و پاشان گەڕایەوە خولی وڵاتەکەی و پەیوەندی بە ئیسپانیۆلەوە کرد و، ئەو یانەیەش لە پێناو دەستبەرداربوون لە هێرشبەرەکەی داوای 25 بۆ 30 ملیۆن یۆرۆ دەکات.