دی لیخت بە مووچەیەکی کەمتر دەچێتە بایەرن

ماتیس دی لیخت بەرگریکاری یانەی یوڤێنتۆس نزیکە لە پەیوەندیکردن بە بایەرن میونشنی ئەڵمانی و ووردەکاری رێککەوتنەکەش ئاشکرادەبێت.

بەگوێرەی تی ئێم دەبلیو،  دی لیخت گرێبەستێک بۆ پێنج وەرز لەگەڵ باڤارییەکان واژۆدەکات و مووچەکەی ١٠ ملیۆن یۆرۆی جێگیرە لەگەڵ چەند گۆڕانکارییەک ئەمەش کەمترە لە موچەکەی ئێستای لەگەڵ یۆڤی کە ١١ ملیۆنە.

یانە ئیتاڵییەکە بڕی ٧٠ ملیۆن یۆرۆی جێگیر و ١٠ ملیۆن یۆرۆی دیکە بەپێی ئاست و ئەنجام وەردەگرێت. وابڕیارە هەر ئەم هەفتەیە پشکنینی پزیشکی بۆ بکرێت و راستەوخۆ گرێبەستەکە واژۆبکرێت.

دی لیخت سێ ساڵە لە تورینە و لەو ماوەیەدا ١١٧ یاری ئەنجامداوە، هەروەها ناسناوێکی خولی ئیتاڵی، جامی ئیتاڵیا و جامی سوپەری ئیتاڵیای بردووەتەوە.