کلاسیکۆ ناسناوی لالیگا یەکلادەکاتەوە
یانەی ریاڵ مەدرید بەشێوەیەکی نافەرمی ناسناوی ئەم وەرزەی خولی ئیسپانی یەکلاکردووەتەوە بەڵام پێویستی بە بردنەوەی کلاسیکۆیە تاوەکو هیچ گومانێک نەهێڵێتەوە.
بردنەوەکەی شەوی رابردوویان بەرامبەر مایۆرکا، جیاوازی خاڵەکانی لەگەڵ نزیکترین رکابەری بەرزکردەوە بۆ ١٠ خاڵ ئەمەش پێش تەنها ١٠ یاری لە کۆتایی وەرز.
تیمەکەی ئەنشلۆتی پاش تێپەڕبوونی ٢٨ هەفتە تەنها ٢ یاری لەم وەرزەدا دۆڕاندووە، بۆ ئەوەی ناسناوەکە لەدەست بدات پێویستە لەم ١٠ یارییەدا تووشی چوار دۆڕان بێت و سیڤیلیا سەرجەم یارییەکانی بباتەوە. ئەگەر ئەوەی یەکەمیش رووبداتە، ئەستەمە سیڤیلیا سەرجەم یارییەکان بباتەوە و تەنها لە پێنج رابردوودا، سێ یاری بەرامبەربووە.
دووهەم نزیکترین رکابەر بارسێلۆنایە، کە ١٥ خاڵ لەدووان و یارییەک کەمتریان ئەنجامداوە. بۆ ئەوەی بارسا ببێتە پاڵەوان، پێویستە مەدرید لەو ١٠ یارییەی کە ماویەتی پێنج جار تووشی شکست بێت.
ئەوەی کەمێک هیوای بە بارسا داوە، ئەوەیە مەدرید جگە لە کلاسیکۆ، هەروەها یاری بەرامبەر سیڤیلیا، ئەتڵەتیکۆ مەدرید و بیتس ماوە و ئەگەر لە کلاسیکۆ بدۆڕێت و بارسا یارییە دواخراوەکەی بباتەوە ئەوا جیاوازییان دەبێتە نۆ خاڵ و چەند یارییەکی زەحمەتیشیان لە پێشە. هەربۆیە چاوەڕواندەکرێت کلاسیکۆ ناسناوی ئەم وەرزەی لالیگا یەکلابکاتەوە.
