یاریگا-
گاریس بەیڵی وێڵزی و یاریزانی یانەی ڕیاڵ مەدریدی ئیسپانی وەڵامی دەنگۆیەكانی پەیوەندیكردنی بە یانەی نیوكاسل یۆنایتد دەداتەوە لە گواستنەوەكانی زستانەدا.
گرێبەستەكەی بەیڵ لە هاوینی 2022 بەسەردەچێت و چاوەڕوانیش دەكرێت دوای كۆتایهاتنی گرێبەستەكەی ڕیزەكانی یانە شاهانەكە جێبهێڵێت.
چەند سەرچاوەیەكی ئینگلیزی ناوی گاریس بەیڵیان بەستبوویەوە بە نیوكاسڵەوە و دەنگۆی ئەوەیان بڵاوكردبوویەوە كە لە گواستنەوەكانی زستانەدا یاریزانەكە پەیوەندی بە یانە ئینگلیزیەكەوە دەكات.
بەپێی كۆتا زانیاریەكان كە پێگەی دیڤینسا سێنترال بڵاویكردووەتەوە بەیڵ سەرجەم ئەو دەنگۆیانەی پشتگوێخستووە و هێرشبەرە وێڵزیەكە تەنها بیری لای پێكانەكەیەتی و دەیەوێت بە زووترین كات بگەڕێتەوە یاریگاكان.
هەمان سەرچاوە ئاشكرایكردووە كە بەیڵ باوەڕی بەخۆی هەیە كە ئاستی جارانی لەژێر ڕاهێنەرایەتیكردنی كارلۆ ئەنچیلۆتی بۆ دەگەڕێتەوە و لەبەر ئەوەش هیچ بیر لەداهاتووی ناكاتەوە.
