بەیاننامەی فەرمی بایرن میونشن سەبارەت بە یاریەكەیان بەرامبەر بارسێلۆنا
یاریگا-
یانەی بایرن میونشنی ئەڵمانی بەیاننامەیەكی فەرمی بڵاوكردەوە سەبارەت بە ئامادەبوونی هاندەران بۆ یاریەكەیان بەرامبەر بارسێلۆنا.
وا بڕیارە ڕۆژی سێشەممە بایرن میونشن ببێتە میوانی بارسێلۆنا لە یاریگای كامپ نۆو لە میانەی یاریەكانی هەفتەی یەكەمی خولی یانە پاڵەوانەكانی ئەوروپا.
پێشتر یەكێتی تۆپی پێی ئەوروپا یوفا ڕایگەیاند هاندەران دەتوانن ئامادەی یاریەكان بن و پاڵپشتی یانەكانیان بكەن ، بەڵام هاندەرانی بایرن ناتوانن لە یاری بەرامبەر بارسێلۆنا ئامادە بن.
بەپێی بەیاننامەی فەرمی بایرن دەسەڵاتدارانی ناوخۆی بارسێلۆنا لە ئێستادا ڕێگە نادەن هاندەرانی میوان بچنە ژوورەوە سەبارەت بەو یاسایانەی كە ئێستا هەرێمی كەتەلۆنیا پەیڕەوی دەكات ، لەبەر ئەوەش بایرن ناتوانێت بلیتی یاریەكەیان بەرامبەر بارسێلۆنا وەربگرێت و بەوەش هاندەرانی یانە باڤاریەكە ناتوانن ئامادەی یاریەكە ببن.
