یاریگا-
بڕیارە سبەینێ لەکاتژمێر 16:30 خولەکی ئێوارە گەڕی حەوتەمی خولی نایابی کوردستان _ قۆناغی کۆتایی بەڕێوەبچێت و هەندێ یانە کێبڕکێی دواهەل دەکەن لەسەر نازناوەکە.
لە شاری هەولێر و لەیاریگای هەندرێن یانەی هەندرێن میوانداری پێشمەرگەی هەولێر دەکات، هەندرێن دوای دۆڕانی بەیانەی زاخۆ لەگەڕی ڕابردوو ئێستا بە 8 خاڵ لەخانەی چوارەمی ڕیزبەندیەکەدێت، یانەی پێشمەرگەی هەولێریش یاری دواهەلی ئەنجامدەدات و لە ئەگەری سەرنەکەوتنی کۆتایی بەکێبڕکێ دێنێت و دادەبڕێت لە یانەکانی سەرووی ڕیزبەند، پێشمەرگە بە 6 خاڵ لە پلەی پێنجەم دێت.
لە قەزای کەلاریش یانەی شێروانە میوانداری یانەی برایەتی شاری هەولێر دەکات، ئەم یاریە بەهێزترین یاری ئەم گەڕەیە چونکە هەردوو یانە بە 11 خاڵ و شێروانە بە پلەی یەکەم دێت و برایەتی لە پلەی دووەمی ڕیزبەندیەکە، بۆیە سبەی چاوەڕوانی یاریەکی ئاست بەرزدەکرێت لەنێوان هەردوویانە.
لە یاریگای نێودەڵەتی زاخۆش یانەی زاخۆ ڕووبەڕووی یانەی سیروانی نوێ دەبێتەوە، زاخۆ دوای ئەوەی لەگەڕی ڕابردوو یەکەم سەرکەوتنی لەخولەکە تۆمارکرد، مەبەستیەتی بەردەوامی بە بردنەوەکانی بدات، هەرچی یانەی سیروانی نوێیە نایەوێ وازوو دەستبەرداری کێبڕکێ کردن بێت لەسەر نازناوەکە و ئێستا لەپلەی سێیەمە بە 10 خاڵ، یانەی زاخۆش بە 6 خاڵ لە کۆتاڕیزبەندی خولەکەیە.
