بارسا و گارسیا بە گرێبەستێکی درێژخایەن گەشتوونەتە ڕێککەوتن

یاریگا- وا دیارە یانەی بارسێلۆنا دواجار دەستی گەشت بە ئامانجە لەمێژینەکەی بۆ هێڵی بەرگری.

ڕۆژنامەی مارکای ئیسپانی بڵاوی کردۆتەوە کە یانە کەتەلۆنییەکە هەر لە مانگی ڕابردوو بە وردەکاریی و بەندەکانی ڕێککەوتنەکە لەگەڵ ئێریک گارسیای ئیسپانی قایل بووه و لە مانگی داهاتوو دەبێتە فەرمی.

بەرگریکارەکەی مان سیتی کە دەرچووی ئەکادیمیای لاماسیایە، ئەم وەرزە گرێبەستەکەی لەگەڵ سیتیزنس کۆتایی دێت و بە خۆڕایی و بۆ ماوەی پێنج وەرز گرێبەستی بارسا واژۆ دەکات.

ئەم زانیارییانە قسەکانی پیپ گواردیۆلا پشتڕاست دەکاتەوە کاتێک سەرەتای ئەم مانگە ڕایگەیاند کە گارسیای تەمەن 20 ساڵ لە هاوینی داهاتوو دەگەڕێتەوە بلاوگرانا.