بڕیارێکی شۆکهێنەر؛ ئەمریکا رێگەی نەدا باشترین ناوبژیوانی ئەفریقا بەشداریی مۆندیال بکات

یاریگا –

لە گۆڕانکارییەکی کتوپڕدا، عومەر ئارتان، ناوبژیوانی نێودەوڵەتیی سۆماڵی کە بڕیاربوو ببێتە یەکەمین ناوبژیوان لە مێژووی وڵاتەکەیدا یارییەکانی مۆندیال بەڕێوەببات، لەلایەن دەسەڵاتدارانی ئەمریکاوە رێگەی پێ نەدرا بچێتە نێو خاکی ئەو وڵاتە و بە فەرمی لە لیستی ناوبژیوانانی مۆندیالی 2026 دوورخرایەوە.

پشت پەردەی رووداوەکە و کاردانەوەی فیفا

عومەر ئارتان، کە ساڵی رابردوو وەکوو باشترین ناوبژیوانی ئەفریقا دەستنیشانکرابوو، کۆتایی هەفتەی رابردوو لە فڕۆکەخانەی نێودەوڵەتیی مەیامی لە لایەن بەرپرسانی ئەمریکاوە رێگری لێکرا، سەرەڕای ئەوەی ڤیزای گەشتیاریی یاسایی و پێویستیشی پێ بووە.

فیفا لە بەیاننامەیەکی فەرمیدا بێدەنگیی شکاند و رایگەیاند کە ئارتان ناتوانێت لە مۆندیال ئامادە بێت، هاوکات بەرپرسیارێتییەکەی خستە ئەستۆی حکومەتی ئەمریکا و رایگەیاند کە فیفا دەسەڵاتی بەسەر پڕۆسەی پێدانی ڤیزا و کۆچبەریی وڵاتانی خانەخوێدا نییە.

سۆماڵ یەکێکە لەو وڵاتانەی کە لە ژێر یاسای قەدەخەکردنی گەشتکردنی توندی ئیدارەی دۆناڵد ترەمپدایە، هەرچەندە هۆکاری سەرەکیی رەتکردنەوەی ئارتان بەڕوونی ئاشکرا نەکراوە، ئێستا ئەم ناوبژیوانە ناچار کراوە بگەڕێتەوە بۆ شاری ئەستەمبوڵ کە لەم مانگانەی دواییدا لەوێ نیشتەجێ بووە.

کێشەی ڤیزا؛ کابوسی نوێی مۆندیالی 2026

حکومەتی سۆماڵ بە توندی سەرکۆنەی ئەم بڕیارەی کردووە و رایگەیاندووە کە ئەمە لێدانە لە بنەماکانی یاریی خاوێن. عیسا عەدەن ئەبشیر، راوێژکاری باڵای وەزارەتی لاوان و وەرزشی سۆماڵ رایگەیاند؛

ئەم بڕیارە نەک تەنیا زیان بە خودی عومەر دەگەیەنێت، بەڵکوو پابەندبوونی تۆپی پێ بە دادپەروەری و لێهاتویی لەناودەبات. ئەو شایەنی پشتگیریی تەواوی کۆمەڵگەی تۆپی پێیە.

ئەم کێشەیەی ئارتان تەنیا نییە؛ چونکە رێوشوێنە توندەکانی ئەمریکا کێشەی گەورەی بۆ چەندین هەڵبژاردەی دیکە دروستکردووە؛

• ئێران: بەهۆی کێشەی ڤیزای یاریزانان و ستافەکەیەوە، ناچار بوو کەمپی مەشق و راهێنانەکانی لە ئەمریکاوە بگوازێتەوە بۆ مەکسیک.

• عێراق: ئەیمەن حوسێن، هێرشبەری هەڵبژاردەی عێراق، بۆ ماوەی نزیکەی حەوت کاتژمێر لە فڕۆکەخانەی ئۆهێری شاری شیکاگۆ راگیرا و لێکۆڵینەوەی لەگەڵ کرا.

• سویسرا: بریل ئیمبۆلۆ، یاریزانی هێڵی پێشەوەی سویسرا، هەفتەی رابردوو ڤیزای رەتکرایەوە، بەڵام دوای تانەگرتنی یاسایی کێشەکەی چارەسەر کرا.