بارسێلۆنا خۆی پارەی نییە و ئێمەش یانەیەکی فرۆشیار نین
بایرن میونشن یانەیەکە دەکڕێت
یاریگا –
ئۆلی هۆینێس سەبارەت بەو دەنگۆیانەی ناوی هاری کەین بە یانەی بارسێلۆناوە دەبەستێتەوە قسەلەڕوو بوو.
بایرن میونشن وەرزەکەی بە ئاهەنگێڕانی سەرکەوتن لە یاریی کۆتایی جامی ئەڵمانیا بەرامبەر یانەی شتوتگارت کۆتایی پێ هێنا، هاوکات بە کۆتاییهێنان بە دەنگۆکانی گواستنەوە، بنەماکانی بۆ وەرزی داهاتوو داڕشت. گەورەترین مژاریش هاری کەین بوو.
هۆینێس سەبارەت بە هێرشبەرە ئینگلیزییەکە گوتی: “هاری کەین باشترین گواستنەوەیە کە ئێمە تاوەکوو ئێستا ئەنجاممان دابێت.”
کاتێک لەبارەی گرنگیپێدانی باسکراوی بارسێلۆنا پرسیاری لێکرا، هۆینێس ئاماژەی بە فەلسەفەی یانەی بایرن کرد و گوتی: “بایرن میونشن یانەیەکە کە دەکڕێت، نەوەکوو بفرۆشێت.”
پاشان راستەوخۆ پرسیاری لێکرا کە ئایا ئەو هێرشبەرە ئینگلیزییە دەمێنێتەوە یان نا، هۆینێس گوتی: “بەڵێ، جگە لەوەش، بارسێلۆنا خۆی هەر پارەی نییە.”
کەین خۆی لە بردنەوەی نازناوەکەدا بەرامبەر شتوتگارت یەکلاکەرەوە بوو. هاتریکێکی کرد و لە یاریگای ئۆڵۆمپی لە بەرلین چەپڵەڕێزانێکی گەورەی لێکرا، کە زیاتر لە 74,000 هاندەر ئاهەنگیان بۆ ئاستەکەی گێڕا.
کەسێکی دیکە کە دوای یارییەکە ستایشی ئەو یاریزانەی کرد، راهێنەری بایرن ڤینسێنت کۆمپانی بوو و گوتی:
ئەو ناوازەیە… لە کۆتایی یارییەکەدا خەریکە پرسیار لە خۆت دەکەیت: ‘ئایا بە راستی گۆڵی کرد؟’ چونکە ئەو زۆر لەوە زیاتری کرد، لە هەموو شوێنێک بوو، بەرگری، هێرشبردن… بە سادەیی یاریزانێکی کامڵە، ناوازەیە، هیچ وشەیەکم نییە وەسفی پێ بکەم.
کەین خۆی ئەو شەوەی وەکوو یەکێک لە باشترین شەوەکانی کاروانی وەرزشیی خۆی وەسف کرد و گوتی:
ئەمە بە دڵنیاییەوە یەکێک بوو لە باشترین شەوەکانی کاروانی وەرزشیی من. بە شێوازێکی بێوێنە بۆ ئەم یاریی کۆتایییە بەپەرۆش بووم. زۆرم دەربارەی ئەمە لەو یاریزانانە بیستبوو کە پێشتر لەگەڵ یانەکەدا ئەزموونی ئەم یاریی کۆتایییەیان کردبوو. پاشان تۆمارکردنی هاتریک لە یاریی کۆتاییدا، ئەمە بە راستی یارییەکی زۆر تایبەت و هەستێکی زۆر تایبەتە. من بە تەواوی شانازی بەمەوە دەکەم. ئەم وەرزەم لەگەڵ بایرن بەدڵ بوو.
هێرشبەرەکەی بایرن ئێستا وەکوو یەکێک لە سەرکردە سەرەکییەکانی تیمی نیشتمانیی تۆپی پێی ئینگلتەرا بەرەو جامی جیهانی بەڕێ دەکەوێت.
Q : What if FC Barcelona wants Harry Kane?
🚨🗣️ Uli Hoeneß (Honorary President of Bayern Munich):
“FC Barcelona don’t have the money to buy him .”😳 pic.twitter.com/liWWffjso9
— CA VA🐐 (@psg__chief) May 23, 2026
