فلیک ئامانجی سەرەکی یانە و یاریزانەکان ئاشکرا دەکات؛ لالیگا یان چامپیۆنزلیگ؟

راهێنەری یانەی بارسێلۆنا رایگەیاند کە ئامانجی سەرەکیی تیپەکە بردنەوەی خولی یانە پاڵەوانەکانە و بە “خەون و ئامانجی یاریزانەکان و یانەکە” ناوی برد.

ئێستا بارسێلۆنا لە لالیگادا بە جیاوازی حەوت خاڵ لە پێش ریال مەدریدەوەیە. لەگەڵ نزیکبوونەوەی یاریی دێربی بەرامبەر ئیسپانیۆل، مشتومڕ هەیە سەبارەت بەوەی ئایا پێویستە تیمەکە پشوو بە یاریزانەکانی بدات یان نا. لێدوانەکانی فلیک ئاماژە بەوە دەکەن کە رەنگە پشوو بە هەندێک یاریزان بدات بۆ ئەوەی سەرنج بخاتەسەر ئەوروپا.

کاتێک پرسیاری لێکرا ئایا لالیگا یان خولی یانە پاڵەوانەکان لە پێشینەی کارەکانیدایە، بەتایبەتی دوای شکستی بەرامبەر ئاتلێتیکۆ مەدرید لە یاریی چووندا، فلیک بە روونی گوتی:

لالیگا گرنگە چونکە رێگەت دەدات بگەیتە خولی یانە پاڵەوانەکان، بەڵام بردنەوەی خولی یانە پاڵەوانەکان خەونی گەورەی راهێنەران، یاریزانان و هاندەرانە.

ئاماژەی بەوەش کرد کە لەم یارییە گەورانەی ئەوروپادا، تیمەکە هەست بە پاڵنەرێکی زیاتر دەکات و ئەو پاڵەوانییەتییەیە کە بە راستی دەیانەوێت بیبەنەوە. فلیک ئەوەی پشتڕاست نەکردەوە کە ئایا گۆڕانکاری لە پێکهاتەکەدا دەکات یان نا، بەڵام بەپێی گوتەکانی، ئەگەرێکی زۆر هەیە هەندێک گۆڕانکاری بکات بۆ ئەوەی یاریزانەکان بۆ یاریی گەڕانەوە بە چالاکی بمێننەوە.