کالافیۆری : لەگەڵ گاتوسۆ زیاتر قسەدەکەم وەک لەگەڵ دایکم!
ریکاردۆ کالافیۆری باسی جینارۆ گاتوسۆی راهێنەر و دۆخی خۆی دەکات لە کۆنگرەی رۆژنامەوانی بەر لە یارییە چارەنووسازەکەی ئیتاڵیا بەرامبەر باکوری ئێرلەندا.
کالافیۆری ستایشی گاتوسۆ دەکات کە زۆر پابەندە بە یاریزانەکان بە جۆرێک لەم چەند مانگەی رابردوودا زیاتر لەگەڵ ئەو قسەی کردووە وەک لە دایکی.
ڕۆژی دووشەممە، جینارۆ گاتوزۆ ڕایگەیاند کە کالافیۆری لە کاتی دۆڕانەکەی ئارسناڵ بە ئەنجامی 2-0 بەرامبەر مانچستەر سیتی لە یاری کۆتایی جامی خولی ئینگلتەرا، کەمێک هەستی بە ناڕەحەتی کردووە.
کالافیۆری بە دەزگاکانی ڕاگەیاندنی گوت، لە نێویاندا ‘فووتبۆڵ ئیتاڵیا’: “هەست بە باشی دەکەم، با لە یاریگادا ببینین چی دەبێت، بەڵام من باشم. لە کاتێکی هەستیاری لەم شێوەیەدا، خاڵی سەرەکی ئەوەیە کە هەمیشە لە ئێستادا بژیت، چێژ لە هەموو ساتێک وەربگریت و هەموو جارێک سەرنجت تەنها لەسەر یەک یاری بێت.”
ڕۆژی پێنجشەممە، ٢٦ی ئازار، ئیتاڵیا لە قۆناغی پێش کۆتایی پاشکۆی پاڵاوتنەکانی (پڵەی-ئۆف) مۆندیال ڕووبەڕووی ئیرلەندای باکوور دەبێتەوە، لە کاتێکدا یارییە کۆتاییە پێشبینیکراوەکە لە دەرەوەی یاریگای خۆی بەرامبەر وێڵز یان بۆسنە و هەرزەگۆڤینا لە ڕۆژی سێشەممە، ٣١ی ئازار ئەنجام دەدرێت.
بەرگریکارەکەی ئارسناڵ گوتی: “بە ڕاستی، وەکو هەمیشە گوتوومە، پێم باشترە تەنها سەرنج بخەینە سەر خۆمان؛ ئێستا کاتی ئەوە نییە سەرنج بخەینە سەر ڕکابەرەکان؛ ئەمە زیاتر بەندە بە خۆمانەوە.”
لەژێر سەرپەرشتی گاتوزۆدا، ئیتاڵیا لە شەش یارییدا ١٩ گۆڵی تۆمارکردووە، بەڵام ٩ گۆڵیشی لێ تۆمارکراوە. لەگەڵ ئەوەشدا، کالافیۆری لەبارەی تۆکمەیی هێڵی بەرگریی ‘ئازۆری’یەوە نیگەران نییە.
ئەو گوتی: “ئەمە کێشە سەرەکییەکە نییە، وەکو هەمیشە کاتێک هەڵەیەک دەکەیت یان گۆڵێکت لێ تۆمار دەکرێت، تەنها یەک بەش تاوانبار نییە. نابێت لەسەر ڕابردوو بوەستین، بەڵکو دەبێت لەم ڕۆژانەدا یەکگرتوو بین و ئەو ئەنجامە بەدەست بهێنین کە هەموومان دەمانەوێت.”
لەم وەرزەدا، کالافیۆری لەسەر ئاستی یانە لە سەرجەم پاڵەوانێتییەکاندا بەشداری لە ٢٩ یارییدا کردووە، گۆڵێکی تۆمارکردووە و سێ ئەسیستیشی دروستکردووە.
بەرگریکارەکەی پێشووی بۆلۆنیا و ڕۆما، لە مانگی حوزەیرانی ٢٠٢٤ و تەنها چەند ڕۆژێک پێش دەستپێکردنی پاڵەوانێتی یۆرۆ، لەژێر سەرپەرشتی لوسیانۆ سپالێتی یەکەم یاری خۆی بۆ هەڵبژاردەی یەکەمی ئیتاڵیا ئەنجامدا، و لە ئێستاشدا خاوەنی ١٢ بەشداریی نێودەوڵەتییە.
