بەبێ ئەو ئەستەمە بگەینە ئامانجەکانمان؛ ماسکێرانۆ ستایشی مێسی دەکات

یاریگا –

راهێنەرەکەی ئینتەر میامی ستایشی ئەستێرە ئەرجەنتینییەکە دەکات کە لە بردنەوەکەی بەرامبەر نیویۆرک سیتی رۆڵێکی یەکلاییکەرەوەی هەبوو.

خاڤیێر ماسکێرانۆی راهێنەری ئینتەر میامی ئەم یەکشەممەیە ستایشی لیۆنێل مێسی کرد. لیۆ بە لێدانێکی راستەوخۆ رێچکەی یارییەکەی گۆڕی لە بردنەوەی 3-2 بەرامبەر نیویۆرک سیتی. دوای یارییەکە لە کۆنگرەی رۆژنامەوانی گوتی:
ئاشکرایە بەبێ مێسی ئەستەمە بگەینە ئەو ئامانجانەی دیاریمان کردووە، هەوڵ دەدەین هێندەی بتوانین ئاگاداری بین. دەزانین کە بە یاریکردن هەست بە زۆرترین ئاسوودەیی دەکات و ئەوە بۆ توانای جەستەیی باشترینە. ئێستا دەچێتە هەڵبژاردەی نیشتیمانی و کاتێک گەڕایەوە دەزانین لەڕووی جەستەییەوە چۆنە.

میامی لە گێمی دووەم شکستی 2-1ـی بۆ بردنەوەی 3-2 گۆڕی. مێسی ئەستێرەی یارییەکە بوو و دووجار تۆپی لە شیشدا پێش ئەوەی بە لێدانی راستەوخۆ گۆڵ بکات، کە خاڵی یەکلاییکەرەوەی یارییەکە و دەستپێکی گەڕانەوەکە بوو. ئەمە گۆڵی ژمارە 901ـی کاروانی وەرزشیی مێسی بوو.

هەفتەی داهاتوو دوایین پشووی یارییە نێودەوڵەتییەکان پێش جامی جیهانی. فینالیسیمای نێوان ئەرجەنتین و ئیسپانیا لە قەتەر لەلایەن یوێفاوە بەهۆی ناکۆکییەکانی ئەمریکا و ئیسرائیل لەگەڵ ئێران کە کاریگەری لەسەر رۆژهەڵاتی ناوەڕاست هەیە، هەڵوەشایەوە. بەهۆی ئەمەوە ئەرجەنتین دوو یاریی دۆستانەی بەرامبەر ماوریتانیا و زامبیا لە 27 و 31ـی ئازار لە مۆمبۆنێرا رێکخست.