داهاتووی هانزی فلیک ئەگەر خوان لاپۆرتا هەڵبژاردنەکان بدۆڕێنێت؟ خۆی وەڵام دەداتەوە

یاریگا –

هانزی فلیک لە دیبەتی نێوان خوان لاپۆرتا و ڤیکتۆر فۆنت نیگەرانە و باس لە پەیوەندی خۆی لەگەڵ دیکۆ دەکات.

دوێنێ بارسێلۆنا رۆژێکی ئاڵۆزی بەڕێکرد، سەرەتا چاڤی هێرناندێز، راهێنەری پێشووی یانەکە کۆمەڵێک لێدوانی دژ بە لاپۆرتا دا و بە درۆزن و ناپاک وەسفی کرد، هۆکاری نەگەڕانەوەی مێسی بۆ ئەو گێڕایەوە چونکە نەیویستووە دەسەڵاتەکانی کەم ببێتەوە، دواتر لە دیبەیتێک کە بۆ لاپۆرتا و فۆنت رێکخرابوو، سەرۆکەکەی پێشووی بارسێلۆنا وەڵامی چاڤی دایەوە و رایگەیاند ئەو بەهۆی ئەنجامە باشەکانی فلیک ئازار دەچێژێت.

ئەمڕۆ، سێشەممە، فلیک لە کۆنگرەی رۆژنامەوانی پێش یاریی یانەکەی بەرامبەر نیوکاسڵ لە قۆناخی 16ـی چامپیۆنزلیگ نیگەرانی خۆی لەو بارەیەوە ئاشکراکرد و رایگەیاند ئێستا ساتەوەختێکی گرنگی وەرزەکەیە و پێویستە سەرنجیان لەسەر یارییەکە بێت، هەروەها باسی لە پتەوی پەیوەندی نێوان خۆی و دیکۆ کرد.

❗️ Hansi Flick: “My future if Laporta loses the election? We’ll have to wait and see. From day one, I’ve enjoyed working with Deco and Bojan.”

“We don’t just analyse the first team, we also look at the players at La Masia. When I arrived, we talked about Casadó, Bernal and… pic.twitter.com/oWguZTzfNZ

— Barça Universal (@BarcaUniversal) March 9, 2026

دەمەوێت سەرنجم لەسەر یارییەکە بێت. پێویستە چاوەڕێی هەڵبژاردنەکان بکەین، لە یەکەم رۆژەوە بەوپەڕی ئاسوودەییەوە لەگەڵ دیکۆ و بۆیان کارم کردووە، ئێمە تەنیا شیکردنەوە بۆ یارییەکانی تیپی یەکەم ناکەین، بەڵکوو بۆ یاریزانانی لاماسیا و بارسێلۆنا Bـیش شیکردنەوە دەکەین و هەمان بیرۆکەمان سەبارەت بە یاریزانەکان هەیە. ماوەی ساڵ و نیوێکە لێرەم و زۆر چێژم وەرگرتووە.

ئێمە تیپێکمان بۆ داهاتوو دروستکردووە، راهێنەری دوای من دەتوانێت سوودی لێ وەرگرێت و دەڵێت هانزی ژێرخانێکی نایابی بنیاتناوە، نازانم ئێستا بۆ ئەم گفتوگۆیە دەکرێت، ئەم هەفتەیە ساتەوەختێکی زۆر گرنگی وەرزەکەیە و پێویستە سەرنجمان لەسەر ئەم یارییە بێت.