یاریگا –
یانەی بارسێلۆنای ئیسپانی، ئەمڕۆ پێنجشەممە، لیستی کۆتایی ئەو بەربژێرانەی کێبڕکێی کورسیی سەرۆکایەتی یانەکە دەکەن راگەیاند هەڵبژاردنەكه بڕیارە له 15ـی ئەم مانگە بەڕێوەبچێت.
ئەنجامی فلتەرکردنی واژۆکان؛ کێ مابووەوە؟
دوای پرۆسەیەکی وردی پشکنین و وردبینیکردنی واژۆکان، دەرکەوت کە کێبڕکێکە تەنیا لەنێوان دوو ناو کورت بووەتەوە، ئهویش خوان لابۆرتا و رکابەرە سەرسەختەکەی ڤیکتۆر فۆنت. ئەم دوو بەربژێرە توانییان بە سەرکەوتوویی لەو سنوورە تێپەڕن کە بۆ کۆکردنەوەی واژۆکان دیاریکرابوو.
لە هۆڵی (ئۆدیتۆری 1899) لە بارەگای یانەکە، ئەنجامی کۆتایی واژۆ دروستەکان بەم شێوەیە راگەیەندرا:
1. خوان لاپۆرتا: 8.169 واژۆی پێشکەشکردبوو، لەو ژمارەیە 7.226 واژۆیان وەک دەنگی دروست وەرگیران.
2. ڤیکتۆر فۆنت: 5.144 واژۆی پێشکەشکردبوو، لەو ژمارەیە 4.440 واژۆیان وەک دەنگی دروست پەسەند کران.
La Junta Electoral proclama Joan Laporta i Víctor Font candidats a la presidència del Club pic.twitter.com/XRaxXOhVAG
— FC Barcelona (@FCBarcelona_cat) March 5, 2026
مارک سیریا؛ گەورەترین دۆڕاوی قۆناخی یەکەم
بەربژێر مارک سیریا بە فەرمی لە کێبڕکێکە دوورخرایەوە، دوای ئەوەی نەیتوانی کەمترین ڕێژەی واژۆکان کۆبکاتەوە کە 2.337 واژۆ بوو. سیریا تەنیا 2.247 واژۆی بۆ هەژمارکرا، سەرەڕای هەوڵە زۆرەکانی لە خولەکەکانی کۆتاییدا بۆ سەلماندنی دروستیی هەندێک واژۆ کە وێنەی ناسنامەیان لەگەڵدا نەبوو.
شەفافییەت و وردبینی ژێر چاودێری دادوەری
جۆسێپ کۆبیڵس، سکرتێری ئەنجومەنی کارگێڕی یانەکە، رایگەیاند کە پرۆسەی وردبینی بۆ ماوەی دوو رۆژی چڕ و لەژێر چاودێری دادوەریدا بەڕێوەچووە بۆ دەستەبەرکردنی یەکسانی لەنێوان بەربژێرەکاندا. ئاماژەی بەوەش کرد کە لێژنەی هەڵبژاردن بە توندی پەیڕەو و یاساکانی جێبەجێکردووە، بەتایبەت لە مەسەلەی هەبوونی وێنەی ناسنامە لەگەڵ هەر واژۆیەکدا.
دەستپێکردنی کەمپەینی هەڵبژاردن و رووبەڕووبوونەوەی راستەوخۆ
بەم ڕاگەیاندنە، کەمپەینی هەڵبژاردن بە فەرمی لە سبەی هەینییەوە دەستپێدەکات و تاوەکو 13ـی ئازار بەردەوام دەبێت. ڤیکتۆر فۆنت هەوڵدەدات ئەم هەڵبژاردنە بکاتە راپرسییەک دژی شێوازی بەڕێوەبردنی لاپۆرتا، ئێستاش گەیشتە خواستەکەی کە رووبەڕووبوونەوەی راستەوخۆیە لەگەڵ سەرۆکی ئێستا لە جەنگێکی یەکلاکەرەوەدا کە داهاتووی یانە کاتالۆنییەکە بۆ ساڵانی داهاتوو دیاریدەکات.
